Bergsteinn ráðinn framkvæmdastjóri UNICEF á Íslandi

Í samstarfi við Capacent Ráðningar hefur Stjórn UNICEF á Íslandi ráðið Bergstein Jónsson sem framkvæmdastjóra landsnefndar UNICEF á Íslandi. Bergsteinn var settur í starfið á fundi stjórnar í morgun. Þetta kemur fram í tilkynningu frá UNICEF á Íslandi.

Bergsteinn Jónsson hefur unnið hjá UNICEF á Íslandi síðan í október 2006 og annast öll verkefni landsnefndarinnar sem ekki snúa að kynningarmálum og fjáröflun, þar á meðal réttindagæslu barna á Íslandi og framkvæmd þróunarverkefna erlendis.

Hann er menntaður mannfræðingur frá Háskóla Íslands og stundaði framhaldsnám við Hróarskelduháskóla í alþjóðlegum þróunarfræðum og samskiptum menningarheima.

Fyrr í sumar sagði Stefán Ingi Stefánsson framkvæmdastjóri UNICEF starfi sínu lausu. Nú hefur Bergsteinn Jónsson verið settur í starf framkvæmdastjóra.

„Það er vissa stjórnar að úr hópi þeirra mörgu umsækjenda sem sóttu um starfið er Bergsteinn Jónsson best til þess fallinn að taka við keflinu og halda uppi því mikla og góða starfi sem unnið hefur verið frá stofnun landsnefndar UNICEF á Íslandi,“ segir í tilkynningunni.

Stefán Ingi Stefánsson, fráfarandi framkvæmdastjóri UNICEF á Íslandi, leiddi undirbúning að stofnun landsnefndar UNICEF á Íslandi árið 2003 og hefur verið framkvæmdastjóri frá formlegri stofnun hennar í mars 2004. Hann heldur nú til Panama þar sem hann mun áfram starfa í þágu barna í hjá UNICEF sem yfirmaður fjáröflunar og samfélagslegrar ábyrgðar fyrirtækja í rómönsku Ameríku og Karíbahafi.

„Stjórn og starfsfólk UNICEF á Íslandi þakkar Stefáni Inga fyrir ötult starf undanfarinn áratug og býður á sama tíma Bergstein hjartanlega velkominn til starfa.“