Útdeiling makrílkvóta stangast á við lög

Vinnslustöðin kærði ákvörðun Jóns Bjarnasonar um heildarkvóta í makríl árið 2010. Óheimilt hafi verið að miða kvóta ekki við veiðireynslu einstakra skipa. Umboðsmaður Alþingis tekur undir það.

Umboðsmaður Alþingis hefur komist að þeirri niðurstöðu að ekki hafi verið farið að lögum við útdeilingu aflaheimilda á makríl. En Vinnslustöðin í Vestmannaeyjum kærði ákvörðun sjávarútvegsráðherra til umboðsmanns.

Miklir hagsmunir eru í húfi þegar makrílveiðar eru annars vegar en þær hafa aukist jafnt og þétt á undanförnum árum bæði innan og utan fiskveiðilögsögunnar.

Með reglugerð sem Jón Bjarnason þáverandi sjávarútvegsráðherra setti árið 2010 var gefinn út heildarkvóti en aflanum ekki skipt niður á skip eftir veiðireynslu. Forráðamenn Vinnslustöðvarinnar í Vestmannaeyjum voru ekki sáttir við þetta og gerðu athugasemdir við ráðuneytið, sem stóð fast á ákvörðun sinni.

Engin breyting varð þar á við stjórnarskipti því síðast í bréfi frá atvinnuvegaráðuneytinu í nóvember 2013 er afstaða þess ítrekuð.

Forráðamenn Vinnslustöðvarinnar töldu að ráðuneytið gæti ekki vikist undan ákvæðum laga um fiskveiðar frá árinu 2006 og veiðar utan lögsögu Íslands frá 1996 sem væru ótvíræð og kvæðu á um að veiðireynsla ætti að ráða við útdeilingu veiðiheimilda. En stjórnendur Vinnslustöðvarinnar vildu meina að pólitiskur vilji til útdeilingar á aflahlutdeild i makril hafi verid settur ofar lögum um stjórn fiskveiða.

Samkvæmt heilidum fréttastofu fellst Umboðsmaður Alþingis á rök Vinnslustöðvarinnar en álit hans verður birt á heimasíðu embættisinsí fyrramálið. Sigurður Ingi Jóhannsson sjávarútvegsráðherra vildi ekKi tjá sig um málið fyrr en hann hefði kynnt sér álit umboðsmanns.