Fjölmörg brot á vopnalögum

Tollverðir hafa að undanförnu lagt hald á umtalsvert magn muna, þar sem innflutningur á þeim flokkast undir brot á vopnalögum.  Nær þrjátíu mál af þessum toga hafa komið upp á síðustu vikum er fram kemur í tilkynningu frá embættinu.

Af þessum málafjölda eru sjö mál þar sem um er að ræða tilraunir til innflutnings á loftbyssum. Þar á meðal eru öflugar loftskammbyssur, sem geta verið stórhættulegar sé þeim beitt. Af öðrum munum sem tollgæsla hefur lagt hald á má nefna kylfur, sveðjur, hnúajárn, fjaðurhnífa,  rafbyssu, (taser),  handjárn og sterka leysibenda. Í mörgum tilvikum hefur, eins og kunnugt er,  skapast stórhætta þegar leysibendum hefur verið beint að fólki og farartækjum.

Tollstjóri kærir mál af þessu tagi til lögreglu og geta brot á skotvopnalögum varðað fangelsi allt að fjórum árum, „nema að þyngri refsing liggi við eftir öðrum lögum,“ eins og lagabókstafurinn kveður á um.