Hátt í 150 bréfdúfur týndust í keppnisflugi

Bóndinn á bænum Lambeyrum í Laxárdal í Dalasýslu fann í gær örmagna dúfu í fjárhúsunum hjá sér. Dúfan var merkt og þegar hafðist upp á eigandanum kom í ljós að þarna var á ferð þjálfuð bréfdúfa sem hafði verið sleppt á Húsavík og var á leið til Hafnarfjarðar. Bréfdúfnafélag Íslands sleppti um 300 dúfum frá Húsavík um síðustu helgi, en hátt í helmingur þeirra hefur enn ekki fundist.

Dúfunni sem fannst í Dölum var komið í fóstur til barnabarna bóndans, sem eru dætur Ásmundar Einars Daðasonar, þingmanns Framsóknarflokksins.

„Stelpurnar passa hana bara mjög vel og gefa henni að borða. Hún er bara í góðu yfirlæti og er að hressast. Hún bara húkti alveg fyrst, enda hefur þetta verið svolítið ferðalag. Þetta er alveg magnað með þessar dúfur, okkur fannst þetta svolítið merkilegt að henni hefði verið sleppt á Húsavík og hefði fundist þarna. Og að hún hafi verið merkt, sko þannig að hún geti komist aftur heim í dúfnakofann sinn,“ segir Ásmundur Einar í samtali við Vísi.

„Henni var víst sleppt á Húsavík, en hefur eitthvað villst af leið því hún var komin þarna á Vesturlandið. Við ætlum að koma henni suður næst þegar það er ferð,“ segir Ásmundur.

Eigandi dúfunnar er Eggert H. Snorrason félagi í Bréfdúfnafélagi Íslands en dúfan var ein 300 þátttakanda í kappflugs keppni félagsins, sem fram fór um síðustu helgi og snerist um að fljúga frá Húsavík til Hafnarfjarðar. Hann segir félagsmenn vera um 25-30, sem rækti bréfdúfur og láti þær keppa í kappflugi. Í þetta skiptið villtist stór hluti keppenda, og einungis helmingur þeirra hafi skilað sér á leiðarenda.

 „Það var ákveðinn kjarni sem fór ekkert frá Húsavík. Þær náðu bara ekki áttinni. Og þær dúfur hafa svo lagt af stað allt of seint og bara ekki komist lengra. Einhverjar dúfur hafa fundist á Húsavík, hálf máttvana, ein í Dalasýslu, ein á Akranesi og ein á Skagaströnd. Þannig að þær eru bara hingað og þangað um landið og hafa bara greinilega ekki náð áttinni,“ segir Eggert.

„Það kemur svona keppni fyrir öðru hvoru en við erum vanir að fá 100% heimtur heim. Þetta var afleitt, alveg afleitt. Það vantar hátt í 150 í dag, en við erum vanir að fá þetta allt heim“, segir Eggert að lokum.

Eggert vill hvetja fólk sem finnur dúfur til að hafa samband við Bréfdúfnafélag Íslands. Dúfur félagsins séu allar merktar með lífhringjum þar sem fram kemur ártal og númer dúfunnar. Nánari upplýsingar má nálgast á heimasíðu félagsins, dufur.is.

Áætlað er að bréfdúfan komist heim til Hafnarfjarðar á morgun.