Hafragrauturinn hætt kominn í Hagaskóla

„Barn sem er að fara að heiman rétt rúmlega átta á morgnana og borðar ekkert fyrr en tólf eða hálf eitt verður að fá eitthvað í millitíðinni,“ segir Ingibjörg Jósefsdóttir, skólastjóri Hagaskóla, en rétt eins og Vísir greindi frá í gær er nemendafjöldi orðinn of stór fyrir mötuneytið. Því þarf að óbreyttu að stöðva matseld í skólanum og þar með hefur skólinn ekki lengur færi á að bjóða upp á hafragraut í fyrstu frímínútum. 

„Við byrjuðum með hafragraut hér fyrir nokkrum árum síðan og finnst það meiriháttar,“ segir Ingibjörg. „Þetta skiptir svo miklu máli fyrir krakkana.“ Hún segir um 200 börn af 490 nýta sér þjónustuna. „Við höfum með hagræðingu og öðru náð að gera þetta,“ útskýrir Ingibjörg en því fylgir auðvitað heilmikið uppvask, rask og vinna. En skólanum hefur þótt þetta millimál skipta miklu varðandi getu barnanna í skólanum. „Ef það ætlar að nýta sér það sem það er að gera í millitíðinni. Það skiptir engu hvort við erum að tala um námslega eða félagslega. Bara að vera hluti af þessu samfélagi sem skólinn er.“

Heilbrigðiseftirlitið sendi skólanum í mánuðinum niðurstöður eftirlits sem kveður skýrlega á um það að mötuneytið getur ekki starfað eins og það hefur verið að gera undanfarin ár. Til þess er nemendafjöldi orðinn of mikill. Skólinn þarf því stærra mötuneyti eða að leggja niður matargerð og hefja framreiðslu matar sem fenginn er annars staðar frá. „Það væri hrikalegt fyrir okkur,“ segir Ingibjörg. 

Hafragrauturinn hefur þó ekki alveg verið sleginn út af borðinu enn þar sem skólastjórnendur leggja mikið upp úr því að geta haldið áfram að bjóða upp á hann. Ingibjörg segir Reykjavíkurborg meðvitaða um að eitthvað þurfi að gerast í húsnæðismálum skólans og hefur hún setið fundi og sent fjölmarga pósta.