„Stuðningsmenn vilja Gauja Þórðar en við viljum hann ekki“

„Sigurður Ragnar verður þjálfari hjá okkur. Það var gerður þriggja ára samningur við hann og ég þarf þá að fara á undan ef hann á að fara,“ segir Óskar Örn Ólafsson, formaður knattspyrnudeildar ÍBV.

Gengi Eyjamanna undir stjórn Sigurðar Ragnars Eyjólfssonar í Pepsi-deild karla í knattspyrnu hefur verið vel undir væntingum Eyjaskeggja það sem af er leiktíð. Í sjö tilraunum hefur liðinu ekki tekist að landa sigri og situr liðið á botni deildarinnar með þrjú stig. Óskar Örn viðurkennir að hafa heyrt af áhuga stuðningsmanna á því að skipta um þjálfara. Þar sé Guðjón Þórðarson efstur á blaði.

„Ég las þetta á stuðningsmannasíðu ÍBV á Facebook,“ segir Óskar en greinilegt er að skoðanir hans og stuðningsmanna á þjálfaramálum fara ekki fullkomlega saman.

„Stuðningsmenn vilja Gauja Þórðar en við viljum hann ekki. Það er bara svoleiðis. Við viljum Sigurð.“

Sigurður Ragnar tók við liði Eyjamanna fyrir leiktíðina en starfið er hans fyrsta hjá karlaliði. Hann þjálfaði áður kvennalandsliðið í tæp sjö ár með góðum árangri.

Guðjón hefur marga fjöruna sopið á litríkum ferli sem þjálfari og knattspyrnustjóri hér heima og erlendis. Hann þjálfaði síðast karlalið Grindavíkur sumarið 2012 þegar liðið féll úr efstu deild með aðeins tólf stig. Samskiptum Guðjóns við Grindavík var þó ekki lokið því hann kærði félagið fyrir vangoldin laun. Fór svo að Grindavík þurfti að greiða Guðjón 8,5 milljónir króna.

Óskar Örn segist að sjálfsögðu hafa áhyggjur af gengi liðsins en allt sé á réttri leið. Liðið leiddi 2-1 gegn Valsmönnum á Hásteinsvelli í gær þegar skammt var til leiksloka. Gunnar Gunnarsson jafnaði hins vegar metin undir lokin.

„Bara ef dómarinn hefði dæmt eins og maður eftir að við komumst yfir í gær. Valsmenn máttu gera allan fjandann eftir það. Þessi aukaspyrna, sem markið kom upp úr, átti aldrei að vera,“ segir Óskar Örn ósáttur við dómara leiksins Vilhjálm Alvar Þórarinsson.

Öll mörkin úr leiknum, aukaspyrnuna umdeildu og viðbrögð Sigurðs Ragnars Eyjólfssonar má sjá í kvöldfréttum Stöðvar 2 í kvöld. Sjöunda umferðin verður svo gerð upp í heild sinni í Pepsi-mörkunum klukkan 22 annað kvöld að loknum stórleik Stjörnunnar og KR sem verður í beinni útsendingu á Stöð 2 Sport klukkan 20.