Á 147 km hraða að missa af flugi

Það sem af er vikunni hafa 24 ökumenn verið kærðir fyrir of hraðan akstur í umdæmi lögreglunnar á Suðurnesjum.

Sá sem hraðast ók mældist á 147 kílómetra hraða á Reykjanesbraut, þar sem hámarkshraði er 90 km. á klukkustund. Um var að ræða erlendan ferðamann, sem var að missa af flugi. Hann greiddi sektina á staðnum.

Þá óku tveir ökumenn á nagladekkjum, þrír voru ekki í öryggisbelti við aksturinn, tveir töluðu í síma án þess að nota handfrjálsan búnað og tveir virtu ekki stöðvunarskyldu.