Inntökupróf í lagadeild HÍ: Ekki hægt að falla

Í kringum eitt hundrað tilvonandi nemendur í lagadeild Háskóla Íslands þreyta nú inntökupróf í deildina.

Í kringum eitt hundrað tilvonandi nemendur í lagadeild Háskóla Íslands mættu í fyrsta inntökupróf deildarinnar sem hófst klukkan níu í Menntaskólanum við Hamrahlíð í morgun. Fjöldinn er nokkuð minni en forseti lagadeildar reiknaði með en gert hafði verið ráð fyrir plássi fyrir 150 nemendur. Því er ljóst að jafnvel þótt nemendum gangi illa á prófinu í dag eiga þeir sæti víst í lagadeildinni.

„Markmiðinu um að fækka nemendum á fyrsta ári er náð,“ segir Eyvindur G. Gunnarsson, forseti lagadeildar, í samtali við Vísi. Hann segir 160-170 nemendur hafa skráð sig í prófið en umtalsvert færri mætt. Enginn kostnaður var við þátttöku þetta árið.

Brottfall nemenda á fyrsta ári við lagadeild HÍ hefur verið gagnrýnt í gegnum tíðina. Fjöldi nemenda sem stenst ekki námskeiðið Almenn lögfræði hefur verið mikill. Eyvindur bendir á að gagnrýnin hafi meðal annars komið fram í ytri úttektarskýrslu.

„Við vissum að prófið myndi fæla þá nemendur frá sem væru ekki fullkomlega einsettir á nám í lagadeildinni,“ segir Eyvindur en markmiðin með inntökuprófinu voru auk þess að auka gæði í kennslunni með smærri nemendahópum. Þá geti námið sömuleiðis allt farið fram inni á háskólasvæðinu.

Eyvindur segir að inntökuprófið sé hluti af þriggja ára plani með ofangreind markmið í huga. Inntökuprófið sé í raun hluti af tvöfaldri síu þar sem Almenna lögfræðin sé áfram síðari sían. Nú standi hins vegar vonir til þess að fleiri nemendur standist námskeiðið.

„Ef prófið gefur gott forspárgildi eru líkur á að hópurinn sem tekinn verður inn eftir tvö ár nái hvort sem er Almennu,“ segir Eyvindur.