Ruslamálið á Suðureyri: "Við erum í þröngu og erfiðu svæði þarna“

Ísafjarðarbær brást skjótt við frétt Vísis um að íbúar á Suðureyri væru orðnir brjálaðir á að rusl flæddi upp úr tunnum og að lykt bærist inn í húsakynni íbúa. Fór starfsmaður bæjarins með auka ruslatunnu til íbúanna sama dag og fréttin birtist.

„Ég tel mig samt ekki hafa átt að sjá um þessa hluti. Ekki öðruvísi en ég sé um leigjendur mína,“ segir Marzellíus Sveinbjörnsson umsjónarmaður fasteigna Ísafjarðarbæjar. Hann vísar ábyrgðinni yfir á verktakann sem sér um að taka ruslið í bænum, Kubb ehf. „Þeir bera ábyrgð á því að það sé nóg af ruslatunnum og ruslið sé tæmt á réttum tíma. Kubbur hefði átt að bæta við tunnum,“ útskýrir Marzellíus. „Ég fór sama dag og fréttin birtist til Kubbs og spurði hvort að þeir hefðu raunverulega séð yfirfullar ruslatunnur og ekkert aðhafst.“ 

En stranda ekki viðbrögð verktakans á því að þið hjá Ísafjarðarbæ eruð ekki tilbúin til að auka fjárútlát vegna sorphirðu á svæðinu?

„Nei. Það ætti engan veginn að stranda á fjárútlátum. Það hefur aldrei komið inn á borð til mín. Aldrei,“ fullyrðir Marzellíus.

Samfélagsleg skylda íbúa að tryggja að pokar liggi ekki um alla lóð

Vandamálið á sér margar hliðar að sögn Marzellíusar. Það á rætur sínar að rekja til þess að ákveðið var að taka upp flokkun á rusli í sveitarfélaginu, breytt var um tunnur og þá komust þær ekki lengur fyrir í þartilgerðu ruslatunnurými við raðhúsið.

„Á þessum stöðum er erfitt um vik af því að það er ofboðslegur snjóþungi í sveitarfélaginu. Þetta ergelsi byrjar eflaust á því að það er ekki hægt að taka ruslið vegna snjóþunga,“ útskýrir Marzellíus. Hann segist hafa sent sérstakan mann á svæðið til þess að moka snjónum í burtu þegar svo ber undir. „Á margan hátt er þetta skiljanlegt, við búum á hjara.“ 

Hann segir þó unnið að því að koma skikki á ruslamál íbúa, aukatunnan sé aðeins til þess að brúa bilið á meðan beðið er eftir lausn. „Málið er í ferli sem ég vona að allir geti sætt sig við. Við ætlum að fá arkitekt til þess að teikna einingu fyrir rusl allra íbúa hverfisins og setja hana mögulega á umferðareyju í miðju þess,“ útskýrir hann en viðurkennir þó að arkitektinn sé ekki byrjaður á verkinu. Hann hafi þó farið með manni frá Sorpu til þess að gera úttekt á svæðinu og leysa vandamálið. „Við erum í þröngu og erfiðu svæði þarna.“

Arkitektinn komi svo með hönnun sem fari að lokum fyrir nefnd í bænum sem þurfi að samþykkja. Því gætu íbúarnir þurft að bíða nokkra stund enn. En Kolbrún Elma Schmidt, íbúi sem hefur þurft að þola ólykt og lélega umgengni, kveðst hafa haft samband vegna vandamálsins fyrst í september á síðasta ári. 

„En auðvitað hvílir á henni viss samfélagsleg skylda að setja ruslapokana í svarta ruslapoka ef ruslið er fullt og setja við hliðina á tunnunni. Svo að það liggi ekki pokar út um alla lóð. Það geri ég heima hjá mér,“ segir Marzellíus. „Svo getur hún líka rúllað tunnunum frá inngangnum og sett í læsingu.“