Fjallar um birtingamyndir klámvæðingar

Miðvikudaginn 4. júní verður efnt til málþings um valdeflandi starf með börnum og unglingum en þetta kemur fram í fréttatilkynningu frá Reykjavíkurborg.

Málþingið verður í Laugalækjarskóla frá kl. 14.00- 16.15 og er samstarfsverkefni skóla- og frístundasviðs Reykjavíkurborgar, Jafnréttisstofu og Embættis landlæknis.

Aðalfyrirlesari er Dr. Dana Edell, aktívisti og fræði- og listakona, og mun hún í erindi sínu fjalla um birtingamyndir klámvæðingar og áhrif hennar á ungt fólk. Þá fjallar hún um hvernig vinna má gegn skaðlegum áhrifum klámvæðingar og stuðla að heilbrigðri kynímynd unglinga. Dana er framkvæmdastjóri SPARK-hreyfingarinnar og hefur víðtæka reynslu af valdeflandi starfi með ungu fólki.

Þorsteinn V. Einarsson, verkefnisstjóri félagsmiðstöðvarinnar Dregyn, mun í sínu erindi fjalla um hvað gerðist þegar tugir unglingsdrengja í Grafarvogi brutust út úr norminu og naglalökkuðu sig. Geta staðalmyndir líka verið heftandi fyrir stráka?

Sigrún Daníelsdóttir, sálfræðingur og verkefnastjóri geðræktar hjá Embætti landlæknis, mun í sínu erindi fjalla um líkamsvirðingu.

Hún hefur um árabil staðið fyrir samfélagsbaráttu fyrir líkamsvirðingu hér á landi og gaf nýverið út bókina Kroppurinn er kraftaverk - Líkamsvirðing fyrir börn sem miðar að því að efla líkamsmynd og virðingu fyrir fjölbreytileika líkamsvaxtar.