Sáu stærstu rándýr jarðar á Skjálfanda

Fjórir búrhvalir hafa synt um Skjálfandaflóa í dag en hvalaskoðunarbátur frá Húsavík kom fyrst auga á þá í hádeginu skammt suður af Flatey. Hvalaskoðunarbátar Húsvíkinga hafa síðan farið nokkrar ferðir til að sýna ferðamönnum þessar sjaldséðu skepnur.

Þessar myndir tók Már Höskuldsson, skipstjóri á Bjössa Sör hjá Norðursiglingu, en þar minnast menn þess ekki að hafa áður séð búrhvali á Skjálfanda eftir að hvalaskoðunarferðir hófust þar fyrir nítján árum. Búrhvalir sjást afar sjaldan svo nærri landi og halda sig venjulega djúpt úti á höfum.

Búrhvalir eru stærstu rándýr jarðar, geta orðið 15-20 metra langir og yfir 50 tonn að þyngd. Þeir eru tannhvalir og verða tennur þeirra yfir tíu sentímetra langar. Kantað höfuðlag er helsta sérkenni búrhvala.

Hjá Norðursiglingu segjast menn raunar hafa séð óvenju margar hvalategundir á undanförnum dögum, þar á meðal steypireyði, hnúfubaka, hrefnur, háhyrninga, höfrunga og hnísur, - og núna einnig búrhvali.