Vill aukna fjármuni í forvarnir

„Besta fjárfestingin og sú arðsamasta liggur í forvörnum. Því þurfum við að setja aukna fjármuni í forvarnir og baráttu við lífstílstengda sjúkdóma. Það er okkar verkefni,“ segir Kristján Þór Júlíusson, heilbrigðisráðherra. Unnið er að því innan heilbrigðisráðuneytisins að móta heilstæða forvarnarstefnu í anda þess sem gerist á Norðurlöndunum.

Fréttablaðið sagði frá því í gær að samkvæmt Alþjóðaheilbrigðisstofnuninni er fórnarkostnaður vegna lífsstílssjúkdóma á Íslandi ógnarhár, en á sama tíma verja fáar vestrænar þjóðir eins litlu fé til beinna forvarna.

Kristján segir dæmin sanna að fé sem varið er til forvarna skili sér hratt til baka með góðri ávöxtun. Hann segir lífstílssjúkdóma áhyggjuefni. „Það er alveg rétt að við töpum mörgum mannárum á óheilbrigðu líferni almennt en í þessari umræðu þarf samt að leggja áherslu á ábyrgð hvers einstaklings á eigin heilbrigði,“ segir Kristján og bætir við að vinna standi yfir í hans ráðuneyti um forvarnamál í ágætu samstarfi við landlæknisembættið. Stofnuð hafi verið ráðherranefnd um lýðheilsumál sem væntanlega skili af sér hugmyndum með haustinu.

Kristján nefnir að ræða mætti hvort ástæða sé til að hnika til í námsskrá skólanna og gera hreyfingu hærra undir höfði. „Þetta snertir nefnilega ekki aðeins heilbrigðismálin heldur uppeldis- og menntunarþætti líka,“ segir Kristján.

Eins og Fréttablaðið greindi frá í gær þá er á Norðurlöndunum verið að innleiða heildstæða stefnu á sviði ósmitnæmra sjúkdóma – lífsstílssjúkdóma. Þar er tekið sameiginlega á stórum áhættuþáttum þeirra og sett eru undir einn hatt hjarta- og æðasjúkdómar, sykursýki, ákveðnir öndunarfærasjúkdómar og krabbamein.

„Við erum að þreifa okkur inn í slíka stefnumörkun,“ segir Kristján og nefnir að í síðustu viku voru samningar undirritaðir við Sjúkratryggingar um innleiðingu svokallaðra hreyfiseðla sem hluta af almennri heilbrigðisþjónustu.