Braut á barni sem hann byrlaði smjörsýru

Karlmaður var dæmdur í tveggja ára og níu mánaða fangelsi í Hérðasdómi Reykjaness í dag fyrir að hafa brotið gegn þremur börnum árið 2010.

Ákæran á hendur manninum, sem heitir Birkir Már Ingimarsson, var í sjö liðum og játaði hann sök í fimm en héraðsdómur sakfelldi hann fyrir tvo. Í dómnum kemur fram að maðurinn hafi átt sér engar aðrar málsbætur en játanir sínar.

Birkir Már var dæmdur fyrir að hafa haft samræði við fjórtan ára stúlku, veitt tveimur börnum á fermingaraldri aðgang að fíkniefnum og aðstoðað þrjú börn við að komast úr umsjón foreldra sinna er hann leyfði þeim að gista á heimili sínu eina nótt.

Einnig var hann ákærður fyrir að hafa gefið 14 ára strák fíkniefni og smjörsýru svo að drengnum var ekki sjálfrátt, „farið með hann inn í svefnherbergi sitt, klætt hann úr fötum, strokið og nuddað á honum kynfærin, látið hann gera það sama við sig og nuddað kynfærum sínum og líkama upp við líkama hans.“

Maðurinn áreitti einnig í samstarfi við annan mann 13 ára stúlku kynferðislega er hún var sofandi á þáverandi heimili hans. Flettu þeir niður um hana brjóstahaldara og bol svo sást í bert brjóst hennar og ljósmyndaði maðurinn athæfið.

Ákæra í málinu var ekki gefin út fyrr en rúmum tveimur árum síðar eða rúmur þremur árum eftir að umrædd atvik áttu sér stað. Í ljósi þess að dómurinn taldi að málið hafi „dregist úr hófi fram“ þótti honum rétt að fresta fullnustu refsingarinnar og láta hana falla niður að tveimur árum liðnum. Því er allur dómurinn skilorðsbundinn.

Var Birki Má gert að greiða börnunum skaðabætur upp á samtals 900 þúsund krónur.

Einnig voru gerð upptæk Spire-flakkari, borðtölva, Nokia N92 farsími, sex ljósmyndir og 13 hreyfimyndir sem sýna börn á kynferðislegan og klámfenginn hátt sem voru í eigu hins ákærða.