Irina Bokova hrósar Vigdísi Finnbogadóttur

Irina Bokova, aðalframkvæmdastjóri Menningarmálastofnunar Sameinuðu þjóðanna (UNESCO) hrósaði framlagi Vigdísar Finnbogadóttur til UNESCO á fundi með Gunnari Braga Sveinssyni í dag. Vigdís er velgjörðarsendiherra UNESCO fyrir tungumál og hefur um árabil gegnt ýmsum trúnaðarstörfum fyrir stofnunina.

Gunnar Bragi þakkaði Bokova fyrir stuðning hennar við Alþjóða tungumálamiðstöð Stofnunar Vigdísar Finnbogadóttur í erlendum tungumálum við Háskóla Íslands en stofnunin hlaut í nóvember 2011 samþykki til að starfa undir formerkjum UNESCO.

Á fundi þeirra í dag lagði Gunnar Bragi áherslu á mikilvægi menntunar í þróunarsamvinnu Íslands, einkum menntun kvenna og stúlkna. stúlkna. Hann sagði Jafnréttisskóla Háskóla Sameinuðu þjóðanna gegna mikilvægu hlutverki í þróunarsamvinnunni, og vakti jafnframt athygli á árangursríku starfi Jarðhitaskólans, Sjávarútvegsskólans og Landgræðsluskólans.

Gunnar Bragi lagði einnig áherslu á mikilvægi þess að hagræða í starfsemi alþjóðastofnana og aðlaga þær að breyttum tímum, en Irina Bokova hefur undanfarin ár stjórnað miklu umbótaferli í UNESCO sem hófst í kjölfar heildarúttektar sem gerð var á starfsemi og rekstri stofnunarinnar 2010. Rætt var um mikilvægi tækninnar og áhrif samfélagsmiðla á öllum starfssviðum UNESCO.