Rithöfundar ósáttir við greiðslur úr bókasafnssjóði

Fanney Birna Jónsdóttir skrifar 27. maí 2014 11:43

Auður Jónsdóttir rithöfundur segist ætla að mótmæla skertum greiðslum úr bókasafnssjóði.

Auður Jónsdóttir rithöfundur, sem meðal annars hefur skrifað bækurnar Ósjálfrátt og Fólkið í kjallaranum, kvartar yfir lækkun á greiðslum til rithöfunda úr bókasafnssjóði á Facebook síðu sinni.

Fréttablaðið greindi frá því í dag að rithöfundar og aðrir sem rétt eiga á úthlutun úr sjóðnum vegna afnota verka þeirra á bókasöfnum fá í ár 17,85 krónur fyrir hvert útlán. Í fyrra var úthlutun fyrir hvert útlán 36,90 krónur.

Auður segir: „Þokkalega súra ríkisstjórn, viltu gjöra svo vel að skila mér (og öllum hinum rithöfundunum) helmingnum af árlegum bókasafnaútlánatekjum mínum sem ég átti að fá núna en þú marghöfða æringi ákvaðst í geðþóttakasti að nota til annars, eins og til dæmis til að lækka veiðileyfagjaldið og hátekjuskatta!“

Margir taka undir með Auði en meðal þeirra sem tekur þátt í umræðunni er Ragnheiður Tryggvadóttir, framkvæmdastjóri Rithöfundasambands Íslands og ritari úthlutunarnefndar greiðslna fyrir afnot bóka á bókasöfnum. Hún sagði í samtali við Fréttablaðið í dag að þetta væru náttúrulega engir peningar sem höfundar væru að fá fyrir lán á verkum sínum en þær fari eftir ákvörðunum fjárveitingavaldsins á hverju ári.

„Yfirleitt finnst mér gaman að leggja peninga (sem þeir eiga) inn á reikninga rithöfunda. það var ekkert skemmtilegt í dag,“ segir Ragnheiður.

Ragnheiður segir í athugasemdum við innlegg Auðar að þetta hafi legið ljóst fyrir frá því fjárlögin voru birt. Rithöfundasambandið hafi verið að glíma við þetta frá því snemma á síðasta ári.

Auður segir þetta hafa farið framhjá sér en nú ætli hún virkilega að mótmæla.

Fundað með ráðherra í síðustu viku

Ragnheiður segir sambandið hafa fundað með Illuga Gunnarssyni mennta- og menningarmálaráðherra í síðustu viku. Hún segir erindum búið að rigna yfir ráðherrann og formanni sambandsins hafi komið mótmælum á framfæri.

Ekki kemur fram í máli Ragnheiðar hvað hafi komið út úr fundinum með Illuga.

Umræðurnar má sjá hér að neðan.

Post by Audur Jonsdottir.

Mest lesið

Fleiri fréttir