„Þetta er svona íslenska leiðin, menn verða að alveg fram á síðustu stundu“

Verkfall grunnskólakennara gæti hafist á morgun, náist samningar ekki í dag. Foreldrar barna í einstökum grunnskólum hafa fengið tilkynningu þess efnis. Ekki liggur fyrir formlegt tilboð af hálfu sveitarfélaga.

Ólafur Loftsson, formaður Félags grunnskólakennara, segir að samningaviðræðurnar gangi ágætlega en býst samt við því að það verði fundað fram á kvöld.

„Samninganefndirnar eru núna í sitthvoru baklandinu að ræða saman,“ segir Ólafur.

Fyrsta vinnustöðvun er boðuð á morgun, fimmtudag. Náist ekki að semja er næsta vinnustöðvun boðuð 21. maí og sú þriðja 27. maí. Ólafur segir að verði samningar enn lausir eftir þann tíma verði staðan endurskoðuð, en ekki hefur verið boðað til allsherjarverkfalls.

„Við reynum að gera allt sem við getum í dag svo það þurfi ekki að grípa til vinnustöðvunar á morgun. Ég get ekki fullyrt um hvort það hafist, það er töluvert enn eftir. Þetta er svona íslenska leiðin, menn verða að alveg fram á síðustu stundu og þá tekst þetta vonandi.“