Sigurður Ingi stoltur: „Skiljanlegt að fyrri ríkisstjórn maldi í móinn“

Sigurður Ingi Jóhannsson sjávarútvegs- og landbúnaðarráðherra fór stoltur yfir níu mánaða starfsferil núverandi ríkisstjórnar í eldhúsdagsumræðum á Alþingi fyrr í kvöld.

„Með vorinu eykst okkur bjartsýni og þor,“ sagði Sigurður og bætti við að hér á Íslandi hafi verið „Miklar breytingar til batnaðar og bjartsýni aukist.“

„Fyrsta verk þessarar ríkisstjórnar var að leggja fram þingsályktunartillögu í tíu liðum. Öllum þessum tíu liðum er lokið eða þeir komnir í farveg,“ sagði Sigurður Ingi um skuldaniðurfellingaráform ríkisstjórnarinnar. „Með þessum frumvörpum næst loks árangur í baráttunni fyrir almennum skuldaleiðréttingum.“

Hann sagði skiljanlegt að þeir stjórnarandstöðuþingmenn sem áttu sæti í, eða studdu, síðustu ríkisstjörn reyni að klóra í bakkann. „Þegar núverandi ríkisstjórn nær slíkum árangri á níu mánuðum er skiljanlegt að fyrri ríkisstjórn maldi í móinn.“ Hann sagði síðustu ríkisstjórn ekki sagst geta farið í almennar skuldaniðurfellingar á síðasta kjörtímabili. „Nú er komið í ljós að vilji er allt sem þarf,“ sagði hann og vitnaði Einar Benediktsson.

Sigurður Ingi sagði að stórt skref hafi verið stigið með afgreiðslu fyrstu hallalausu fjárlaganna síðan árið 2004. Hann sagði að tekið væri eftir góðum störfum ríkisstjórnarinnar á alþjóðavísu. Þar vitnaði hann í hagspár OECD, sem geri ráð fyrir 2,7 prósent hagvexti í ár og 3,2 prósent á næsta ári. Hann sagði að viðskiptajöfnuður hafi verið jákvæður í fyrsta sinn síðan 2002. Einnig taldi hann ráðstöfunarfé fjölskyldna hafa aukist með skattalækknum.

Hann tiltók einnig að ríkisstjórnin hafi sett fjögurra milljarða innspýtingu í heilbrigðiskerfið og að almenn löggæsla hafi verið efld um land allt.

En þrátt fyrir að allur þessi árangur hafi náðst að mati Sigurðar Inga eru tiltekin verkefni sem bíða lausnar. Þar sagði hann afléttingu fjármagnshafta vera efsta á blaði.

Sigurður fjallaði einnig um aukna bjartsýni stjórnenda í atvinnulífinu. Að jafnaði væri sex þúsund fleiri á vinnumarkaðinum en á síðasta kjörtímabili. Hann sagði Fjárfesting hefði aukist á meðal smærri fyrirtækja, „sem er mjög jákvætt,“ sagði ráðherrann.

Hann sagði þessa viðhorfsbreytingu í atvinnulífinu vera gríðarlega mikilvæga og þakkaði störfum ríkisstjórnarinnar. „Hún sprettur ekki af engu.“

Tweets about '#eldhusdagur' Twitter / Search - #eldhusdagur twitter.com