Sýknaður af ákæru fyrir kynferðisbrot gegn fjórtán ára pilti

Hæstiréttur staðfesti í dag sýknudóm yfir karlmanni sem ákærður var fyrir að hafa kynferðismök við fjórtán ára gamlan pilt. Maðurinn var einnig ákærður fyrir að hafa greitt piltinum með fíkniefnum. Þá var hann einnig ákærður fyrir að hafa áreitt piltinn kynferðislega með því að hafa ítrekað sent honum kynferðisleg og ósiðleg smáskilaboð og leitast við að hitta hann í kynferðislegum tilgangi.

Móðir piltsins fann smáskilaboð í síma hans og tilkynnti hún lögreglu um málið. Skilaboðunum lýsti hún sem ógeðslegum.

Maðurinn var sýknaður af ákæru um að hafa haft kynferðismök við piltinn og að hafa greitt honum fyrir þar sem engin gögn voru því til sönnunar. Í dómnum segir: „Í dómi héraðsdóms, sem staðfestur var í Hæstarétti með vísan til forsendna hans, var vísað til þess að vitnisburður A fengi ekki þann stuðning af öðrum gögnum málsins sem þyrfti til að unnt væri að leggja hann til grundvallar gegn eindreginni neitun X, enda væru einungis þeir tveir til frásagnar um atvik umrætt sinn.“

Hann var sýknaður af því að hafa áreitt piltinn kynferðislega af þeim sökum að hann vissi ekki hversu ungur pilturinn var. Framburður mannsins um það fékk stoð í gögnum málsins þar sem í netspjalli þeirra á milli sést að pilturinn sagðist vera átján ára gamall.