Nauðsynlegt að gera upp stjórnartíð Davíðs Oddssonar

Í bók sinni Skuggi sólkonungs skrifar Ólafur Arnarson um feril Davíðs Oddssonar í stjórnmálum, Seðlabankanum og í ritstjórastól Morgunblaðsins. Ólafur segir nauðsynlegt fyrir Sjálfstæðisflokkinn að gera upp Davíðstímann.

„Flokkurinn á enn eftir að gera upp þessa Davíðstíma. Það er bráðnauðsynlegt fyrir flokkinn að gera það. Án heiðarlegs uppgjörs við þessa tíma nær flokkurinn ekki aftur trúnaðarsambandi við fólkið í landinu. Þetta trúnaðarsamband er að molna. Við sjáum það t.d. í Reykjavík þar sem fylgi flokksins er rétt rúmlega 20 prósent,“ segir Ólafur.

Hann segir að Davíð beri á margan hátt ábyrgð á því sem gerðist hér á landi fyrir og eftir hrun.

„Almenningur á Íslandi hefur gengið í gegnum mjög miklar hremmingar út af þessu hruni. Þessu hruni sem ég tel og margir aðrir að hafi orðið verra hér á Íslandi fyrir þá sök að Sjálfstæðisflokkurinn leyfði Davíð Oddssyni að leika lausum hala. Það hefði verið þörf á því að koma Davíð út úr Seðlabankanum fyrir hrun,“ segir Ólafur.