Skoðað verður hvort afnema eigi refsingar fyrir vörslu á neysluskömmtum

Þingsályktunartillaga þingflokks Pírata um mótun stefnu til að draga úr skaðlegum áhrifum vímuefnaneyslu var samþykkt á Alþingi í gær. Alþingi er komið í sumarfrí og þingi var frestað í gærkvöldi. Mörg mál fengu því afgreiðslu í gær.

Í kjölfar þess að þingsályktunartillaga Pírata var samþykkt verður skipaður stýrihópur af heilbrigðisráðherra.

Hópurinn mun meðal annars taka til skoðunar félagslega þjónustu fyrir vímuefnaneytendur og finna leiðir til að efla forvarnir og upplýsta umræðu í samfélaginu. Hópurinn mun einnig skoða hvort afnema eigi refsingar fyrir vörslu fíkniefna á neysluskömmtum.