Lögregla leitar vitna vegna nauðgunar

Lögreglan á höfuðborgarsvæðinu leitar vitna sem varpað geta ljósi á ferðir konu um tvítugt í nótt en grunur leikur á að henni hafi verið nauðgað.

Um klukkan fimm í nótt kom konan á neyðarmóttöku Landspítalans í Fossvogi en fyrr um nóttina var hún á skemmtistöðunum B5 og English Pub í miðborginni. Síðan er ekki vitað um ferðir hennar fyrr en hún bankaði upp á og leitaði aðstoðar í húsi við Langholtsveg í Reykjavík. Þaðan var konunni ekið á neyðarmóttökuna.

Talið er að konan hafi knúið dyra á nokkrum stöðum á Hólsvegi og Langholtsvegi áður en eftir henni var tekið, en hún kom að Hólsvegi frá Hjallavegi og gekk síðan áfram Langholtsveg.

Við rannsókn málsins leitar lögreglan upplýsinga um ferðir konunnar í nótt og annað sem kann að varpa ljósi á málið og biðlar því til almennings. Konan, sem er með dökkt axlarsítt hár og beinan topp, var klædd í dökkar buxur, hvítan jakka, bleik/appelsínugulan topp og var í dökkum skóm með pinnahælum. Hún var með stórt hálsmen (gylltir hlekkir) og er í meðallagi há.

Þeir sem geta veitt upplýsingar um málið er vinsamlegast beðnir um að hafa samband við lögreglu. Upplýsingum má koma á framfæri í einkaskilaboðum á Facebook-síðu Lögreglunnar á höfuðborgarsvæðinu, í tölvupósti á netfangið abending@lrh.is eða í síma 444-1000.