„Svaraðu spurningunni“

„Af því að nú er liðið eitt ár frá alþingiskosningum, þá er kannski kominn tími til að spyrja hæstvirtan forsætisráðherra „hvar eru 300 milljarðarnir?“.“ Þetta sagði Helgi Hjörvar, þingflokksformaður Samfylkingarinnar í óundirbúnum fyrirspurnartíma á Alþingi í dag og beindi orðum sínum til Sigmundar Davíð Gunnlaugssonar, forsætisráðherra.

„Ég á auðvitað við þá 300 milljarða sem boðaðir voru að myndu skapast í samningum við þrotabú föllnu bönkunum. “

Þá óskaði hann eftir að heyra frá forsætisráðherra hvað hafi verið gert og til hvað ráðstafana eigi að grípa til að tryggja það að peningarnir skili sér og bætir við að ekki sé raunsætt að halda að 300 milljarðar fáist í þessum samningum. 

Í kosningastefnuskrám Framsóknarflokks og Sjálfstæðisflokks mátti finna loforð um skuldavanda heimilanna og lagði Framsóknarflokkurinn höfuðáherslu á að nýta það svigrúm sem skapast við uppgjör þrotabúa bankanna til að leiðrétta stökkbreytt verðtryggð húsnæðislán.  Við þetta áttu að fást þrjú hundruð milljarðar.

Stjórnarandstaðan fullyrðir að þrjú hundruð milljörðum hafi verið lofað og að þeir hafi allir átt að nýtast í skuldalækkanir heimilanna.

„Nú er talað um 300 milljarða svigrúm við uppgjör slitabúa föllnu bankanna og afléttingu hafta. Ég hef aldrei sagt að það yrðu endilega 300 milljarðar í því svigrúmi. Ég hef hins vegar svarað því þegar ég er spurður að ég teldi að 300 milljarðar væri ekkert sérstaklega hátt mat hvað varðar hugsanlegt svigrúm,“ svaraði Sigmundur.

Tillögur um skuldaniðurfellingar upp á 150 milljarða liggja nú fyrir og hefur verið greint frá því að sækja eigi 80 milljarða króna til kröfuhafa föllnu bankana.  Þá eigi að fjármagna 70 milljarða með skattleysi á séreignarlífeyrissparnað skuldara.

„Þingmaður er greinilega farinn að gera ráð fyrir því að svigrúmið styttist og verði til og þar með að auka væntingarnar til að segja „300 milljarðar er ekki nóg. Það þarf meira,““ sagði Sigmundur. Í tvígang heyrðist kallað úr þingsal.

„Svaraðu spurningunni.“