Innlent

Skemmdarverk unnin á listaverkum nemenda

Sunna Karen Sigurþórsdóttir skrifar
Lukka Sigurðardóttir og verkið hennar, Peace Piece.
Lukka Sigurðardóttir og verkið hennar, Peace Piece. mynd/lukka

Skemmdarverk voru unnin á listaverkum tveggja nemenda á foropnun útskriftarsýningar nemenda á BA-stigi í hönnun, arkitektúr og myndlist síðastliðinn fimmtudag. Útskriftarsýningin er haldin í Listasafni Reykjavíkur og stendur hún yfir í tvær vikur. Lukka Sigurðardóttir á verkið Peace Piece og er hún önnur þeirra sem varð fyrir barðinu á ódæðismönnunum. Verk hennar fjallar um frið og er það hvít brotakúla úr gifsi.

„Tveir menn smygluðu sér á sýninguna og stukku upp á kúluna þannig að hún dældaðist. Kúlan hangir á keðju sem er olíuborin og varð kúlan því töluvert kámug,“ segir Lukka. Hún telur mennina vera af erlendu bergi brotna og telur allar líkur á að þeir hafi verið undir áhrifum áfengis.

Lukka segir að skornast hafi upp úr kúlunni og að hafi hún orðið töluvert kámug eftir verknaðinn. mynd/lukka

Hún segir að töluvert mikið af fólki hafi verið á sýningunni, en viðstaddir hafi talið að um gjörning væri að ræða og var þetta því ekki stöðvað af.

Framkvæmd verksins tók Lukku þrjár vikur og var þetta því töluvert áfall fyrir hana þegar hún sá hvað hefði gerst. Lukka ætlar að kæra verknaðinn finni hún út hverjir mennirnir eru.

„Ég var virkilega sár en er þó fegin að þetta voru fullir menn sem kunna sig ekki frekar heldur en samnemendur mínir eða kennarar.“

Hún segir að mennirnir hafi fært sig yfir í næsta sal og rænt þar flösku sem samnemandi hennar hafði hannað.

„Mennirnir töldu þetta vera áfengi og við heyrðum af því síðar um kvöldið að mennirnir hafi orðið ansi fúlir þegar í ljós kom að í flöskunni var vatn en ekki áfengi.“

Lukka náði þó að laga verkið og er það til sýnis í Listasafni Reykjavíkur. Lukka fékk myndir úr öryggisvél safnsins og vonast hún til þess að einhver geti borið kennsl á mennina. Myndina er að sjá hér að neðan.

Að sögn Mörtu Þórðardóttur, kynningar- og markaðsstjóra Listaháskólans, sjá nemendur um öryggisgæslu sjálfir. Hún segir nemendur skipta með sér vöktum þá daga sem sýningin stendur yfir. Hún segir þó að á fimmtudaginn síðastliðinn, þegar atvikið átti sér stað, hafi hver og einn nemandi átt að fylgjast með sínu verki.

Hér sjást mennirnir tveir. Myndin er tekin úr öryggismyndavél Listasafnsins.


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.