Ekki marktækur launamunur milli kynja í Garðabæ

Ný launagreining Capacent Gallup fyrir Garðabæ sýnir að konur í starfi hjá bænum eru með hærri grunnlaun en karlar. Þó fá karlmenn hærri upphæðir greiddar fyrir yfirvinnu, vaktaálag og akstur. Heildarlaun karla eru rúmum 3% hærri en heildarlaun kvenna. Þessi munur er vel innan skekkjumarka. Þetta kemur fram á heimasíðu Garðabæjar.

Markmið launagreiningarinnar var að skoða hvort munur væri á launum kynjanna hjá Garðabæ og hver hann væri út frá greiddum launum bæjarins í október 2013. Unnið var með laun fólks í 70-100% starfi, eða laun 112 karla og 449 kvenna.

Samkvæmt könnuninni fá konur 10% hærri grunnlaun en karlar. Þegar tekið er tillit til áhrifa aldurs, starfsaldurs, starfsstéttar og atvinnugreinar er munurinn enn konum í vil um 2%, en það er vel innan skekkjumarka.

Þegar heildarlaun eru skoðuð fæst önnur niðurstaða, en karlar í fullu starfi eru með 4% hærri heildarlaun en konur. Þegar tekið er tillit til annarra breyta er munurinn körlum í vil um 3%, og þá vel innan skekkjumarka.

Samkvæmt þessum tölum er enginn marktækur kynbundinn munur á heildarlaunum karla og kvenna hjá Garðabæ, segir í skýrslu Garðabæjar.