Ferðamenn sólgnir í einstakan miðbæ Reykjavíkur

Um tíma óttuðust menn að verslun myndi hreinlega leggjast af á helstu verslunargötum borgarinnar en sú varð ekki raunin. Þvert á móti blómstra minni verslanir þar sem áhersla er lögð á íslenska hönnun, framtak og sköpunargleði.

Þannig leggja verslunarmenn áherslu á hugtök eins og upplifun og hreinleika, einmitt orð sem við tengjum við vinsæla ferðamannastaði á borð við Gullfoss og Geysi.

Það gleymist stundum að miðborg Reykjavíkur er vinsælasti ferðamannastaður landsins. Aukning ferðamanna hefur kallað á miklar áherslubreytingar hjá verslunarmönnum. Það er til marks um þessa einstöku þróun að 46 þúsund ferðamenn fóru frá landi í janúar síðastliðnum.



„Við getum sagt við útlendinga að varan ekkert er framleidd „in house“ og þeim þykir mikið til þess koma og finnst magnað að þeir séu virkilega að ræða við sjálfan listamanninn,“ segir Ófeigur Björnsson, gullsmiður. „Svoleiðis er ekki auðfundið í þessum stóra heimi.

Bolli, gullsmiður og sonur Ófeigs, segir verslunarþyrpinguna í Reykjavík einstaka á heimsvísu. Hvergi sé að finna jafn lifandi umhverfi verslunar og þjónustu.

Njarðarskjöldur og Freyjusómi eru árleg verðlaun sem afhent eru verslunum fyrir góða þjónustu og ferskan andblæ í ferðaþjónustu. Ófeigur gullsmiður hlaut Freyjusómann að þessu sinni. Í þessari rótgrónu verslun á Skólavörðustíg hefur Ófeigur og fjölskylda hans staðið að og skipulagt fjölmarga atburði sem laða að bæði íslendinga og ferðamenn.



Annar reynslubolti fær síðan Njarðarskjöldinn fyrir góðan söluárangur til erlendra ferðamanna. Gilbert úrsmiður, já og geimfari, rekur einu úraverksmiðju landsins á nokkrum fermetrum á Laugavegi.

„Það kom einn hérna um daginn sem sagðist eiga hundrað úr en aldrei hafa hitt úrsmið. Hann bað um að taka í höndina á mér,“ segir Gilbert Ó Guðjónsson. „Ég sagði honum að kíkja inn á verkstæði, þar var strákurinn minn að setja saman íslenskt úr. Það gerði þetta meira spennandi.“

„Náttúran hefur sín þolmörk en hér eru þolmörkin félagslega,“ segir Einar Bárðarson, forstöðumaður Höfuðborgarskrifstofu. „Þetta eru samfélagsleg þolmörk. En ég held að það sé enn svigrúm utan háannar. Þetta litar okkar samfélag litríkum og skemmtilegum litum.“