Adebayor bjargaði Tottenham

Tottenham komst í kvöld í sextán liða úrslit Evrópudeildar UEFA eftir dramatískan sigur, 3-1, á Dnipro Dnipropetrovsk.

Spurs tapaði fyrri leiknum, 1-0, og það blés ekki byrlega fyrir enska liðinu er Roman Zozulya kom Dnipro yfir.

Christian Eriksen jafnaði fyrir Spurs og skömmu síðar var komið að vendipunkti leiksins. Markaskorarinn Zozulya skallaði þá Jan Vertonghen í teignum og var vikið af velli.

Spurs nýtti sér liðsmuninn til hins ítrasta. Emmanuel Adebayor skoraði tvívegis og sá til þess að Tottenham komst áfram í keppninni.