Mágur Suarez spilar með KR í sumar

KR-ingar hafa fengið leikheimild fyrir Gonzalo Balbi og mun hann spila með liðinu í Pepsi-deildinni í sumar.

Baldur Stefánsson hjá knattspyrnudeild KR staðfesti þetta í samtali við Fótbolta.net í morgun en Balbi hefur helst vakið athygli hér á landi fyrir að vera mágur Luis Suarez, leikmanns Liverpool.

Hann kom fyrst hingað til lands síðasta sumar en ekkert varð af því að hann gengi til liðs við KR þar sem ekki tókst að semja við hans gömlu félög á Spáni um uppeldisbætur.

„Þessi lið slökuðu síðan á klónni í vetur og þá náðust samningar sem allir eru sáttir við,“ sagði Baldur. „Við bindum miklar vonir við þennan strák, hann er ungur og efnilegur.“

Balbi, sem er 21 árs gamall bakvörður, lék með KV á dögunum en gekk ekki frá samningi við félagið. Hann þarf hins vegar að vera á leikmannasamningi til að geta spilað með KR í sumar.