„Staðan er algjörlega óásættanleg fyrir alla aðila“

„Staðan er algjörlega óásættanleg fyrir alla aðila“ segir Sigurður Ingi Jóhannsson umhverfisráðherra um málshraða hjá úrskurðarnefnd umhverfis- og auðlindamála. 

Samkvæmt lögum skal úrskurðarnefndin úrskurða þremur til sex mánuðum eftir að hún fær málsgögn. Dæmi eru um að bíða hafi þurft úrskurðar í eitt og hálft ár.

Nanna Magnúsdóttir, forstöðumaður úrskurðanefndarinnar, segir hátt í tvö hundruð mál bíða afgreiðslu. Nefndin hafi því óskað eftir auknu fjármagni.

„Það er bara ákveðinn ómöguleiki fyrir okkur að vinna hraðar án þess að eitthvað annað komi til,“ segir Nanna.

Sigurður Ingi stefnir að því að bætt verði úr vandanum. „Við munum leggja fram frumvarp um aukafjárveitingar til úrskurðarnefndarinnar þegar Alþingi kemur saman í haust.“ Einnig verði unnið að skipulagsbreytingum til að auka málshraðann.

Ráðherra bætir við að í sumar verði reynt að finna nefndinni fjármagn með því að færa fé milli fjárlagaliða. Óvíst sé hvort það takist.

Nanna segir skýringuna á málshraðanum þá að málum hafi fjölgað umfram áætlanir og úrskurðarnefndin hafi verið fáliðaðri en gert var ráð fyrir þegar nefndin var stofnuð 1. janúar 2012.

Umhverfisráðherra er ekki einn um að vera óánægður. Í síðustu viku bókaði bæjarstjórn Fljótsdalshéraðs að það sé „algerlega óásættanlegt að opinber úrskurðarnefnd sjái sér ekki fært að fara að fyrirmælum laga“. Sveitarfélagið hefur kært Orkustofnun vegna álitamála sem tengjast hækkandi vatnshæð í Lagarfljóti vegna Kárahnjúkavirkjunar.

„Kærendur hafa að jafnaði ríka hagsmuni af því að fá úrskurði í sínum málum og krefst bæjarráð þess að yfirvöld sjái til þess að lögum verði fylgt í þessu máli sem og öðrum,“ undirstrikar bæjastjórn Fljótsdalshéraðs.

Nánar má lesa um málið í Fréttablaðinu í dag.