„Það stefnir allt í verkfall aftur á fimmtudag“

„Það stefnir allt í verkfall aftur á fimmtudag,“ segir Árni Stefán Jónsson, formaður SFR, stéttarfélags í almannaþágu.

Um 300 sjúkraliðar og nærri 200 ófaglærðir starfsmenn á hjúkrunar- og dvalarheimilum fyrir aldraða lögðu niður störf í átta klukkustundir í gær. Auk þess raskaðist starfsemi SÁÁ verulega þar sem áfengisráðgjafar lögðu niður störf.

Verkfallið hafði veruleg áhrif á starfsemi hjúkrunarheimilanna þótt ekki skapaðist neyðarástand. Þess var gætt að allir heimilismenn fengju að borða og fengju lyf.

Samninganefndir sjúkraliða, SFR og Samtaka atvinnulífsins hittust í gær. Að sögn Árna Stefáns var fundurinn árangurslaus. Krafa þessara hópa er að njóta sambærilegra launa og ríkisstarfsmenn hafa á öðrum sjúkrastofnunum. Þá vilja menn fá viðurkennt í samningum að þeir njóti sömu réttinda og starfsmenn ríkisins.