Augljóst lögbrot í jeppakynningu

Nýtt erlent kynningarmyndband sem tekið er á Reykjanesi fyrir nýjan Land Rover jeppa sýnir hvernig kostir bílsins utanvegar eru sérstaklega kynntir - en staðurinn er friðslýst landsvæði. Umhverfisstofnun segir málið alvarlegt og klárt lögbrot.

Myndbandið var fjarlægt af netinu eftir hádegi í dag eftir það það vakti neikvæða athygli, meðal annars á facebook. Ökumaður bílsins á myndbandinu er Nick Rufford breskur blaðamaður The Sunday Times. Hann sýnir í fimm mínútna löngu myndbandi hvernig hann prufukeyrir jeppann um grjót og möl utan vegar á óbyggðari svæðum Íslands, nærri Kleifarvatni í fólkvanginum. Umhverfisstofnun mun krefjast þess að lögregla rannsaki málið.

Ólafur A. Jónsson sviðsstjóri á sviði Náttúru hjá Umhverfisstofnun sagði í fréttum Stöðvar tvö í kvöld að það sæist hvar þetta væri og annað af tveimur myndskeiðum væri við vestanvert Kleifarvatn. Þetta væri klárt brot á lögum um náttúruvernd.

Friðlýstur en fær ekki frið

Reykjanesfólkvangur var friðlýstur árið 1975. Mikið er þar um jarðhitasvæði og náttúruminjar, eldfjöll mörg og sérstklega hraundyngjur og gossprungur. Móbergs- fjöll og stapar í óteljandi myndum eru þar. Aðspurður hvort það gerist oft að þarna sé verið að leika sér á bílum segir Ólafur svo miður svo vera. „Þetta hefur verið vandræðasvæði hvað það varðar. Það hefur loðað við að þetta sé svona leiksvæði fyrir mótorsportið, allt og mikið því miður2.“

Ökumaðurinn sæti refsingunni

Reglan er að ökumaðurinn sé dregin til ábyrgðar séu nægar sannanir fyrir hendi um hver hafi setið við stýri í utanvegaakstrinum. Viðurlög eru vanalega sektir, tvö til fjögurhundruð þúsund krónur en einnig má beita varðhaldi í allt að tvö ár.