Van Gaal ekki hættur á leikmannamarkaðnum

Stuttu eftir að fregnir bárust af því að Manchester United hefði komist að samkomulagi við Real Madrid um kaupverðið á Angel Di Maria fóru breskir miðlar að greina frá því að félagið væri ekki hætt á leikmannamarkaðnum.

Þegar hefur verið gengið frá kaupunum á Luke Shaw, Ander Herrera og Marcos Rojo en talið er víst að Di María bætist við þann hóp seinna í dag. Samkvæmt enskum miðlum greiðir Manchester United 59,7 milljónir punda fyrir Di María ásamt árangurstengdum greiðslum.

Samkvæmt heimildum ESPN er Arturo Vidal, síleski miðjumaður Juventus, næsta skotmark Manchester United. Vidal hefur verið orðaður við Rauðu djöflana í allt sumar en ítölsku meistararnir hafa fullyrt að hann sé ekki til sölu.

Það vakti hinsvegar athygli þegar Van Gaal tilkynnti orðrétt að hann væri hrifinn af honum sem leikmanni eftir 1-1 jafntefli gegn Sunderland um helgina.