Innlent

„Býst við að þetta sé alvarlega veikur einstaklingur“

Sunna Karen Sigurþórsdóttir skrifar
Grétar með hryssuna sína, Sól.
Grétar með hryssuna sína, Sól. vísir/stefán
„Verðum við ekki bara öll að reyna að standa saman, hafa augun ennþá meira opin og fylgjast með í kringum okkur?“ segir Grétar Hallur Þórisson, eigandi hryssunnar sem var misþyrmt um helgina í viðtali við Harmageddon.

Grétar kom að hryssu sinni liggjandi úti í haga um helgina og sá fyrir tilviljun blóðtauma á innanverðu læri hennar.

„Ég gekk þarna út í haga eins og ég geri gjarnan og það var tóm tilvijun að ég sé þetta. Það er nú ekki eins og maður gangi um hagana daglega og lyfti taglinu á hrossunum.“

Skurður hryssunnar.vísir/aðsend
Merin er fylfull og hélt Grétar að hún hefði látið folaldið. Við nánari athugun sá hann að blóðið kom úr skurði á kynfærum hryssunnar. Grétar gekk um svæðið og athugaði hvort hún hefði einhvers staðar getað rispað sig en ekkert benti þó til þess. Hann tók mynd af sári hryssunnar, sem er 5 sentimetra langt og sentimetra djúpt, og bendir allt til þess að skurðurinn sé af mannavöldum.

Grétar gerir ráð fyrir því að þetta hafi verið gert í skjóli nætur því hann hafði ekki orðið var við neinar mannaferðir.

„Sem betur fer kannast ég ekki við þessar kenndir og skil auðvitað ekkert í því. En ég bara býst við því að þetta sé alvarlega veikur einstaklingur. Geri ekki ráð fyrir að heilbrigt fólk bara geti gert svona.“

„Manni finnst þetta rosalega óhuggulegt og ég get ekki ímyndað mér hvað maður myndi segja eða gera ef maður myndi standa einhvern af verki.“

Merinni líður vel og grær sár hennar fljótt og örugglega. Hún er á húsi en fer aftur á haga á næstu dögum.


Tengdar fréttir

Önnur hryssa með skurði á kynfærum

Nýtt mál er komið upp þar sem skurðir fundust á kynfærum hryssu. Talið er að áverkarnir séu af mannavöldum. Málið var kært til lögreglunnar á Sauðárkróki fyrr í þessum mánuði en lögreglan á Egilsstöðum hefur svipað mál til rannsóknar. Hjá lögreglunni á Sauðárkróki fengust engar upplýsingar um stöðu málsins aðrar en þær að það væri til rannsóknar. Þannig fékkst því ekki svarað hvort einhver liggur undir grun eða hvort málin eru talin tengjast. Þrjár hryssur á Norðurlandi fundust í byrjun mánaðarins með skurði sem taldir eru af mannavöldum. Tvær þeirra voru með skurði á snoppu en ein var með skurði á kynfærum og í skeið. Eigandi hrossanna hafði strax samband við dýralækni sem eftir skoðun komst að þeirri niðurstöðu að hryssurnar hefðu ekki getað veitt sér áverkana sjálfar, og því er talið um mannanna verk að ræða. Hryssurnar fengu skjótt viðeigandi aðhlynningu og voru sár farin að gróa eftir örfáa daga. Þeir sem þekkja til málsins segja það afar óhuggulegt, sér í lagi í ljósi þess að svipað mál kom upp í umdæmi lögreglunnar á Egilsstöðum fyrir rúmum mánuði. Þá fann hestamaður tvo skurði á kynfærum hryssu þegar hann var í útreiðatúr og sá blæða úr hryssunni. Dýralæknir var kallaður til og málið kært til lögreglu, en fljótt vaknaði grunur um að um svokallaðan "hestaripper" væri að ræða, dýraníðing sem nýtur þess að misþyrma hrossum. Heitið hestaripper er dregið af nafni breska fjöldamorðingjans Jack the Ripper, betur þekktur hér á Íslandi sem Kobbi kviðrista.

Hryssu misþyrmt á kynfærum

Dýralæknir segir málinu svipa til ódæðisverka sem framin voru víða um land árið 2011 þegar fjölda hrossa var misþyrmt.

Hryssur stórslasaðar eftir meintan níðing

Hryssa fannst sárkvalin og blæðandi, með illa útleikin kynfæri, í girðingu í Kjós um síðustu helgi. Hún hefur verið til aðhlynningar á Dýraspítalanum í Víðidal undanfarna daga. Önnur hryssa í sömu girðingu hafði áður verið færð undir læknishendur af sömu ástæðu. Eigendur hryssanna hafa kært athæfið til lögreglu.

Mest lesið


Fleiri fréttir

Sjá meira


×

Mest lesið