Skæð baktería greinist á Landspítalanum

MÓSA baktería hefur greinst á smitsjúkdómadeild á Landspítalanum í Fossvogi. Smitið nær til sjúklinga, starfsmanna og umhverfis deildarinnar. Tveir sjúklingar hafa þegar greinst með bakteríuna og þrír starfsmenn Landspítalans. Bakterían greindist rétt fyrir helgi.

Að sögn Más Kristjánssonar yfirlæknis á smitsjúkdómadeild lágu niðurstöður umhverfisræktana fyrir í morgun, og í ljós kom að vinnusvæði voru töluvert sýkt.

„MÓSA er smitandi baktería sem berst til að mynda með snertingu. Þetta eru bakteríur sem eru ónæmar fyrir hefðbundnu penisillíni sem gerir það að verkum að úrval sýklalyfja til að glíma við sýkinguna sjálfa er takmarkað,“ segir Már.  Hann segir jafnframt að finnist ekki viðeigandi sýklalyf við bakteríunni geti hún leitt til dauða, það sé þó sjaldgæft. „Það er þó þannig að þrátt fyrir að bakterían sé til staðar þýði það ekki að sýkingin sé það. En núna er okkar aðaláhersla að uppræta þetta.“

Gripið hefur verið til ráðstafana til að takmarka frekari útbreiðslu innan spítalans og upprætingar smitsins.  Deildinni hefur verið lokað fyrir innlögnum sjúklinga og heimsóknum til sjúklinga. Þá er jafnframt unnið að því að útskrifa sjúklinga sem unnt er til að greiða fyrir innlögnum nýrra sjúklinga. Á vef Landspítalans segir að ljóst sé að tafir verði á eðlilegri starfsemi lyflækningarsviðs þar sem legurými spítalans er takmarkað.

Bakterían getur lifað á húð og í nefi án þess að valda einkennum. Það er ekki fyrr en hún kemst í gegnum varnir líkamans að hún veldur sýkingum. Meðferðarmöguleikar gegn MÓSA eru takmarkaðir en bakterían er einum varasöm hjá einstaklingum með skert ónæmiskerfi. Komist hún hins vegar í sár, blóðbraut eða aðra vefi getur hún valdið misalvarlegum sýkingum, svo sem húðsýkingum, skurðsárasýkingum og blöðrubólu nýbura.

Fólk sem leitar til spítalans er beðið um að sýna starfsmönnum biðlund ef tafir verða á innlögnum. Sjúklingar og ættingjar eru beðnir um að sýna skilning og veita stuðning við útskriftir.