Hafnfirskur hjólreiðamaður fær engar bætur frá 15 ára nágranna

Hæstiréttur staðfesti á fimmtudag dóm Héraðsdóms Reykjaness sem í febrúar síðastliðnum hafnaði bótakröfu 37 ára karlmanns á hendur móður 15 ára drengs og tryggingafélagi fjölskyldunnar. Maðurinn slasaðist þegar hann kastaðist af reiðhjóli sínu í september 2010 þegar drengurinn var 11 ára. Kenndi hann drengnum um sem hann sagði hafa hlaupið í veg fyrir sig með fyrrnefndum afleiðingum. Hefði slysið valdið tímabundinni 100 prósenta örorku og varnarlegri átta prósenta örorku.

Maðurinn var á reiðhjóli og kominn skamma leið frá heimili sínu. Var hann að hjóla niður götu þegar drengurinn gengur út á götuna, hægra megin frá hjólreiðamanninum séð, en á sama tíma var vörubifreið ekið upp götuna. Maðurinn sagði drenginn, sem er nágranni hans, ekki hafa sýnt nægilega aðgát en sjálfur hafi hann verið á fimm til tíu kílómetra hraða á klukkustund. Drengurinn sagðist hins vegar hafa litið í báðar áttir áður en hann hélt yfir götuna. Þó hafi hann ekki orðið var við manninn. Lentu þeir saman með fyrrnefndum afleiðingum fyrir hjólreiðamanninn.

Hjólreiðamaðurinn taldi tryggingafyrirtækið skaðabótaskylt en lögmaður foreldranna benti á að engin fordæmi væru fyrir því að gangandi vegfarendur þyrftu að bæta tjón vegna óhappa í umferðinni. Gæti slíkt leitt til óvissu um stöðu gangandi vegfarenda, hvort þeir væru þá almennt skaðabótaskyldir í umferðinni.

Hæstiréttur komst að sömu niðurstöðu og komist var að í héraði að takmarkaðar upplýsingar væru um aðdraganda slyssins auk þess sem maðurinn hefði átt að sýna sérstaka árverkni í ljósi þess að hann varð var við bæði vörubifreiðina og drenginn. Var bótakröfu mannsins því hafnað og móðir drengsins, fyrir hans hönd, sýknuð af kröfunni. Málskostnaður fyrir Hæstarétti var látinn falla niður.