Matarkarfan fimmtungi dýrari en í ESB

Matur og drykkur er um fimmtungi dýrari hérlendis en sem nemur meðaltali í ríkjum ESB. Þetta kemur fram í nýrri úttekt Eurostat.

Verð matarkörfunnar hér á landi er átján prósentum hærra en meðalverð í ESB, en munurinn er enn meiri í nokkrum einstökum vöruflokkum.

Brauð og kornmeti og tóbak er þannig 30 prósentum dýrara hér á landi og áfengi er 112 prósentum dýrara. Áfengi er ekki talið með í matarkörfunni.

Innan ESB er verðlag áberandi hæst í Svíþjóð, Austurríki og Danmörku, en í því síðastnefnda er verð á mat og drykk 43 prósentum hærra en meðaltalið, og brauð og kornmeti er tæpum 60 prósentum dýrara.

Áfengi er dýrast í Finnlandi af öllum ESB-löndunum, 75 prósentum yfir meðalverði.

Verð er lægst í Póllandi, þar sem það er næstum 40 prósentum lægra, en næst koma Búlgaría og Rúmenía, þar sem matarkarfan er um þriðjungi ódýrari en að meðaltali í öllum ESB-ríkjunum.

Hæsta verðlagningin af þeim löndum sem til eru tekin er þó í Sviss og Noregi. Matvælaverð í Sviss er þannig 55 prósentum yfir ESB-meðaltali og í Noregi er það 86 prósentum yfir. Í Noregi er síðan langsamlega hæst verð á tóbaki, sem er 170 prósentum yfir meðallagi, og áfengi, sem er næstum þrefalt dýrara en að meðaltali í ESB-ríkjunum.

Rétt er að taka fram að ofangreindar tölur taka ekki mismunandi kaupmátt innan ríkja með í reikninginn, en í fyrra var verg landsframleiðsla á mann, eftir að leiðrétt hafði verið fyrir mismunandi kaupmátt, tólf prósentum hærri hér á landi miðað við meðaltal í ESB-ríkjum, og í Noregi var talan 95 prósentum hærri.