Stofnanir bjartsýnar á að milljónastyrkir skili sér

Matís á von á 1,5 milljóna evra styrk frá Evrópusambandinu (ESB) í formi IPA-styrkja vegna þriggja verkefna sem stofnunin sótti um á síðasta ári. Verkefnin sem samþykkt voru hlutu fimm hundruð þúsund evrur hvert, sem samsvarar rúmlega 80 milljónum íslenskra króna á verkefni, eða rúmum 240 milljónum alls. Fjármagnið hefur þó ekki skilað sér til stofnunarinnar.

Sveinn Margeirsson, forstjóri Matís, segist bjartsýnn á að styrkirnir komi í gegn og ber engan kvíðboga þó að úthlutunin frestist eitthvað.

Fréttablaðið greindi frá því í gær að vegna hlés á aðildarviðræðum íslenskra stjórnvalda við ESB væru þessir styrkir, og mun fleiri, í frosti þar sem utanríkisráðuneytið væri nú að fara yfir hvaða verkefni væru beintengd viðræðunum og hver ekki. Þau verkefni sem eru það ekki munu að öllum líkindum fá fjármagnið.

Gunnar Bragi Sveinsson utanríkisráðherra sagði í samtali við Fréttablaðið að ekki lægi ljóst fyrir hvenær ráðuneytið lyki þessari greiningu. Framkvæmdastjóri Rannís hefði búist við því að styrkirnir væru búnir að skila sér.

„Þessi verkefni tengjast ekkert umsóknarferlinu sem slíku heldur hafa þau sterka tengingu við byggðaþróun með því að auka verðmæti á mismunandi stöðum, nýta auðlindir og byggja upp hæfni hjá mannauði,“ segir Sveinn.

„Ég hafði ekkert endilega gert ráð fyrir því að fjármagnið skilaði sér fyrr en í haust. En auðvitað þætti mér afar óheppilegt, í ljósi markmiða okkar og uppbyggingar í matvælaiðnaði almennt, ef verkefnin yrðu ekki framkvæmd.“

Þá var samþykkt í fyrra að veita Matís 1,9 milljónir evra, eða rúmar 300 milljónir íslenskra króna, til að framfylgja reglugerðum um matvælaöryggi sem hafa verið innleiddar í gegnum EES.

Sveinn segir það verkefni komið af stað en fjármagnið fari einungis í tækjakaup á rannsóknatækjum og samstarf við þýska stofnun um matvælaöryggi, BfR. Því hafi aldrei verið gert ráð fyrir því fjármagni hingað til lands með beinum hætti.

Þörungaræktun, uppsjávarfiskur og vistvæn nýsköpunVerkefnin sem Matís fékk styrki fyrir frá ESB eru: 

1. Uppbygging þörungagarða á Reykjanesi og Suðurlandi

2. Vöruþróun með uppsjávarfisk á Austfjörðum

3. Vistvæn nýsköpun á Vesturlandi og Vestfjörðum

ESB hefur úthlutað 500.000 evrum á hvort verkefni um sig.

Veðurstofunni ekki verið sagt að halda sig til hlés

Veðurstofa Íslands fékk samþykktan 1,7 milljóna evra IPA-styrk, sem samsvarar 275 milljónum króna, í apríl í fyrra vegna verkefnis sem er nú þegar farið af stað. Verkefnið er fjórþætt og snýr að innleiðingu á lögum um stjórn vatnamála sem samþykkt voru á Alþingi árið 2011. 

Ingvar Kristinsson, þróunarstjóri hjá Veðurstofunni, hefur ekki miklar áhyggjur af því að styrkurinn skili sér ekki. 

„Miðað við þær yfirlýsingar sem utanríkisráðuneytið hefur gefið er ég bjartsýnn,“ segir hann. „Það er ekkert enn komið af peningum, en stóran hluta sjáum við ekki neitt þar sem hann fer beint í útboð á vegum ESB og er algjörlega á vegum þess.“

Ingvar segir það rangt mat að fjármagnið sé í frosti hjá ESB. „Það er enginn búinn að segja okkur að halda okkur til hlés, það er bara frekar tímaskortur hjá sambandinu sem veldur því að þetta hefur ekki komist lengra,“ segir hann.