Bjargvættirnir í grasinu

Ungir starfsmenn Vinnuskólans í Reykjavík hófu störf í vikunni. Þessir krakkar mættu glaðbeittir til vinnu í beðin við Árbæjarskóla og stunda garðyrkjustörfin með jákvæðni að leiðarljósi. Fæst þeirra ætla þó að leggja garðyrkjuna fyrir sig en finnst gaman að vinna saman yfir sumartímann.

Það eru hressir strákar í vinnuskólanum ,,Þetta er algjör snilld. Maður kvartar helst yfir of háum launum.“ segja dugnaðarforkarnir og grínistarnir Daníel, Kristján Óli, Ýmir, Benjamín Andri og Arnór Elí.

,,Það skemmtilegasta við starfið er leiðbeinandinn okkar hún Togga.“ Að sögn þeirra er mikilvægt að hafa hressan yfirmann í svona starfi.

Jákvæðni er lykilorð hópsins og Daníel vill koma því á framfæri að honum þyki sérstaklega gaman að reyta arfa. 

Vinnuskólinn fylgir grænfánastefnunni

Fyrra starfstímabil nemenda hófst nú á mánudag og stendur til mánaðarmóta. Nemendum er yfirleitt raðað í hópa með jafnöldrum sínum úr sama skóla.

Vinnuskólinn fylgir grænfánastefnunni en það er alþjóðlegt verkefni sem á að auka umhverfismennt í skólum. Þessi græni fáni er umhverfismerki sem nýtur virðingar víða í Evrópu sem tákn um árangursríka fræðslu og umhverfisstefnu í skólum.

Til þess að komast á græna grein og fá leyfi til þess að flagga Grænfánanum þurfa skólarnir að stíga skrefin sjö, en það eru ákveðin verkefni sem efla vitund, nemenda, kennara og annarra starfsmanna skólans um umhverfismál.

Nemendur í Árbæjarskóla eru duglegir við að fylgja grænfánastefnunni. Þeir fá ekki bílfar í vinnuna heldur hjóla eða ganga, nota fjölnota nestisbox frekar en einnota nestispoka og hvetja yfirmann sinn til þess að gera slíkt hið sama.

Þeir gengu raunar svo langt að hóta því að henda eggjum í bíl leiðbeinandans ef hún svikist undan grænfánastefnunni og mætti á honum, en það var allt gert í góðu gamni.

Afgerandi áhrif á fegurð borgarinnar

Dagný Rut Jónsdóttir og Jóhanna Ósk Guðmundsdóttir luku við grunnskóla nú í vor. Þær stefna ekki á að leggja fyrir sig garðvinnu í framtíðinni en finnst skemmtilegt að vinna við þetta yfir sumarið.

„Það er gaman að vera með öllum krökkunum.“ segja stöllurnar. Þær hafa ekki ákveðið hvað tekur við þegar sumarvinnunni lýkur en Dagný segist vilja ferðast og vera með vinunum. „Ætla bara að hafa það kósí,“ bætir Jóhanna við áður en þær halda tilbaka í moldarbeðin.

62 ár eru síðan Vinnuskóli Reykjavíkur var stofnaður, árið 1951, og hafa þúsundir unglinga starfað á vegum hans. 1.830 unglingar störfuðu síðasta sumar hjá skólanum. Vinnuafl skólans er mikilvægt og hefur afgerandi áhrif við að ná fram markmiðum borgarinnar um að hafa hana hreina og fallega. Ef nemendur Vinnuskólans sinntu ekki þessum störfum þyrfti að bjóða þau út eða að viðkomandi aðilar yrðu að ráða til sín starfsfólk til að sjá um þessi verkefni.