Ferðamenn borga stórfé til að dorga

Ferðamönnum býðst nú að leigja veiðistöng og dorga í Reykjavíkurhöfn.

Ferðamannaiðnaðurinn hefur blómstrað hér á landi undanfarin ár og af því tilefni hafa skotið upp kollinum ýmsar nýjungar í borginni ætlaðar ferðamönnum.

Rent a rod, sem útleggst á íslensku „leigðu stöng“, hefur aðeins verið starfrækt í um tvær vikur. Starfsemin fer fram í litlum skúr á Reykjavíkurhöfn og býður upp á skammtímaleigu á veiðistöngum fyrir ferðamenn sem geta dorgað í höfninni. Tveir austurrískir ferðamenn gátu ekki setið á sér að prófa að dorga en þeir sögðust vera meðalreyndir veiðimenn.

„Þetta var frábært,“ fullyrtu félagarnir eftir að þeir skiluðu stöngunum. „Jafnvel þó að við höfum ekki veitt neinn fisk,“ bættu þeir við og hlógu. Herramennirnir tveir sögðust ekki vera með þaulskipulagða dagskrá fyrir daginn, í raun og veru væru þeir spenntastir fyrir því að finna huggulegan garð, opna einn kaldan öl og njóta veðursins.

Skammtímaleiga á veiðistöngum hefur ekki verið í boði áður. Áður en þessi þjónusta var sett upp á höfninni var aðeins hægt að fara í sérstakar sjóveiðiferðir sem eru dýrari og ekki eins aðgengilegar fyrir ferðamenn, segir Fannar Örn Hafþórsson, starfsmaður Rent a rod.

„Eigandinn, Jakob Hrafnsson, er mikill veiðikall og sá að það vantaði svona þjónustu í bæinn þar sem það geta ekki allir farið á sjóstöng. Þetta er sérstaklega gott fyrir þá sem eru sjóveikir og vilja veiða með fast land undir fótum. Áður hefðu ferðamenn þurft að kaupa sér sína eigin stöng ef þeir vildu veiða í höfninni,“ bætir hann við.

Fannar býst við miklum vinsældum leigunnar en lítil reynsla er komin á verkefnið eins og er. Enginn vafi er þó á því að litli skúrinn við höfnina er skemmtileg viðbót í flóru þeirrar afþreyingarmöguleika sem ferðamönnum stendur til boða að nýta sér þegar þeir dveljast í borginni.

Leiguverð á stöngum hjá Rent a rod

Það kostar sitt fyrir ferðamenn að dorga í höfninni. Verðið er eftirfarandi:

Hálftími kostar 1.500 krónur.

Klukkustund kostar 3.000 krónur.

Tvær klukkustundir kosta 4.990 krónur.