Ekki boðleg aðstaða fyrir leiðsögumenn

Leiðsögumenn telja aðstæður sem þeim eru boðnar upp í rútum á óviðunandi og krefja rútufyrirtækin um úrbætur. Vinnueftirlitið hvetur fyrirtæki í ferðaþjónustu til að fara yfir vinnuaðstæður í bílum.

„Sumar rútur eru einfaldlega allt of þröngar fyrir leiðsögumennina, það er ekki gert ráð fyrir því að leiðsögumennirnir hafi lappir, hvað þá að þeir hafi gögn með sér,“ segir Örvar Már Kristinsson, formaður Félags leiðsögumanna.

„Öryggisbeltin ná oft bara yfir mjaðmirnar í stað þess að vera þriggja punkta,“ segir Örvar. Þá séu sætin, sem oft eru samanleggjanleg, mörg þannig að þau myndu ekki teljast boðleg skrifstofufólki í heilan dag, hvað þá leiðsögumönnum sem hossist um misjafna vegi langa vinnudaga.

Þá sé það þreytandi til lengdar að þurfa að halda á hljóðnema til að tala við farþegana, í stað þess að vera með handfrjálsan búnað. Örvar segir einnig óþægilegt að hafa ekki spegla til að sjá farþegna án þess að snúa sér í sætinu.

Örvar bendir á að gjarnan sé vel hugsað um aðstöðu bílstjóra, sem sitji margir á sérstökum loftpúðasætum, á meðan leiðsögumennirnir virðist gleymast.

„Ég tel að það ætti ekki að vera erfitt að bæta úr þessu. Ef vinnulöggjöfin segir að fólk eigi að hafa mannsæmandi aðstöðu þá verða rútufyrirtækin að laga þetta,“ segir Örvar. „Ég hef fulla trú á því að rútufyrirtækin hafi mikinn áhuga á að breyta aðstöðu leiðsögumanna og koma til móts við kröfur þeirra.“

Kannast ekki við kvartanir



„Við höfum ekki fengið þessar kvartanir,“ segir Kristján Daníelsson, framkvæmdastjóri rútufyrirtækisins Kynnisferða. Hann segir að haldnir séu reglulegir fundir með bílstjórum og leiðsögumönnum og þetta hafi ekki komið upp á þeim fundum.



Þórir Garðarsson, talsmaður rútufyrirtækisins Allrahanda, segir rútuflota fyrirtækisins mikið endurnýjaðan og í rútunum sé pláss fyrir leiðsögumenn eins og Evrópustaðlar kveði á um.

Í bréfi sem Vinnueftirlitið hefur sent fyrirtækjum í ferðaþjónustu, samtökum atvinnurekenda og stéttarfélögum eru fyrirtæki í ferðaþjónustu hvött til að fara yfir vinnuaðstöðu bílstjóra og leiðsögumanna til að tryggja öruggt og heilsusamlegt vinnuumhverfi.

„Þetta er fyrsta skrefið, en við munum í framhaldinu fara yfir hvað þarf að gera,“ segir Þórunn Sveinsdóttir, deildarstjóri þróunar- og eftirlitsdeildar Vinnueftirlitsins.