Fann skilaboð frá skipverja í fjörunni

Hlín Magnúsdóttir, tvítug Kópavogsmær, fann síðastliðna helgi í Gufuskálavör á Snæfellsnesi tæplega sjö ára flöskuskeyti.

Hlín var á ferðalagi með fjölskyldu sinni um Snæfellsnes, nánar tiltekið í Ólafsvík þegar hún rakst á gripinn sem vakti athygli hennar. „Ég gekk í fjörunni þegar ég sá flösku. Hún reyndist síðan vera flöskuskeyti dagsett 29. nóvember 2006.“

Skeytið var frá dönskum manni sem var skipverji á danska skipinu Mary Arctica. Í skeytinu kemur fram nákvæm staðsetning skipsins en samkvæmt því var skipverjinn staddur 200 mílum vestur af Orkneyjum.

„Við erum á leiðinni til Grænlands frá Írlandi. Ef þú finnur þessa flösku vinsamlegast sendu mér skilaboð. Og síðan er heimilisfangið hans í Danmörku,“ les Hlín. „Ég er að fara að skrifa bréf til hans, ég er ekki alveg búin að ákveða hvað ég ætla að skrifa en ég sendi allavega mynd af mér með skeytið.“

Hlín segir fundinn hafa fært henni nýja trú á fyrirbærið. „Mig hefur alltaf dreymt um að finna flöskuskeyti. Þetta fær mig örugglega til að senda slíkt sjálf fyrst að það er möguleiki á að maður finni svona.“

„Ég á von á barni í nóvember, það er spurning hvort það kemur á þessum degi. Það væri svolítið fyndið,“ bætir Hlín við að lokum.