Skólameistarar vilja sálfræðinga í skóla

Skólameistarar stærstu framhaldsskóla landsins sammælast um nauðsyn þess að hafa sálfræðiþjónustu í boði fyrir nemendur. Verkmenntaskólinn á Akureyri er eini framhaldsskólinn sem hefur ráðið sálfræðing til skólans, en aðrir skólar hafa einnig boðið nemendum sínum upp á slíka þjónustu, þó í annarri mynd.

Kristján Pétur Ásmundsson, skólameistari Fjölbrautarskóla Suðurnesja, segir forsvarsmenn skólans hafa brugðist við þessari miklu þörf nemenda fyrir nokkrum árum og það hafi gefist vel. Nemandi getur þá talað við námsráðgjafa sem vísar honum áfram til sálfræðings og greiðir skólinn þrjá viðtalstíma á hvern nemanda.

„Við ræddum á sínum tíma hvort við ættum að ráða sálfræðing í hlutastarf en það varð úr að þetta væri betri leið því þá sæist meðal annars ekki þegar krakkarnir fara til þeirra,“ segir Kristján. „Við leituðum eftir fjárhagslegri aðstoð hjá ráðuneytinu á sínum tíma en það var ekki talin ástæða til að verða við því.“

Olga Lísa Garðarsdóttir, skólameistari Fjölbrautarskóla Suðurlands, fagnar umræðunni.

„Við vorum langt komin með verkefni sem gekk út á að fá fjárveitingu til að gera tilraun með sálfræðiþjónustu þar sem þörfin er mikil,“ segir hún. „En það kom bakslag í það og síðan þá höfum við velt þessu mikið fyrir okkur því þörfin er mikil, það er engin spurning.“

Hallur B. Reynisson, skólameistari Framhaldsskólans á Laugum, segir sálfræðing koma í skólann einu sinni í mánuði til að sinna bæði nemendum og starfsfólki endurgjaldslaust einn tíma á önn.

Hann segir að auðvitað væri best að fá sálfræðinginn oftar þar sem hann er fullnýttur og vel það þegar hann kemur. „Þetta hefur sloppið til, en það eru líka nemendur sem leita sér sálfræðiþjónustu til Akureyrar. Og okkur finnst það skila árangri í rekstri skólans,“ segir hann og bætir við að til greina komi að biðja ráðuneytið um aukafjárveitingu til að getað fengið hann oftar.