Lítil Ítalía leynist á Laugaveginum

„Mér fannst vanta ítalskan stað sem býður upp á mat úr alvöru ítölsku hráefni,“ segir Ítalinn Antonino Neri sem nýverið opnaði lítinn ítalskan veitingastað sem nefnist Piccolo Italia (Litla Ítalía) á Laugavegi 100. Þar býður Nino, eins og hann er gjarnarn kallaður, uppá veitingar sem unnar eru úr ítölsku hráefni ásamt allskyns ítölskum vörum sem hann selur á staðnum.

Nino flutti hingað til lands fyrir sjö árum þegar hann fékk vinnu á hóteli á Húsavík. „Ég ætlaði bara að vera hér yfir eitt sumar en þegar ég heimsótti Reykjavík þá varð ég dáleiddur af friðsemdinni og kyrrðinni í borginni,“ segir Nino sem elskar að ganga um götur borgarinnar án þess að eiga það í hættu að vera áreittur.

Nino er upprunalega frá ítölsku eyjunni Sardiníu en fluttist ungur til Þýskalands þar sem hann vann sem kokkur í 25 ár. Nino segist hvorki sakna Ítalíu né Þýskalands og er búinn að festa rætur hér á Íslandi.

Nino býr til pasta frá grunni sem er lýsandi fyrir ítalska maratgerð. Á Litlu Ítalíu er einnig hægt að fá ítalskan geitaost frá Sardiníu og mozzarella ost sem gerður er úr mjólk ítalskra vatna-vísunda, sem hvergi er hægt að fá annarsstaðar á landinu.

Nino talar hvorki íslensku né ensku og segist tjá sig við viðskiptavini sína með höndum sínum og augum. „Fólkið hér á Íslandi er svo vinalegt og rólegt að það er ekkert mál að gera sig skiljanlegan,“ segir Nino sem er hæstánægður með reksturinn. „Fyrsta árið er náttúrulega alltaf erfitt en nú er Laugarvegurinn að lifna við og sólin farin að láta sjá sig,“ segir Nino sem lítur jákvæðum augum til framtíðar.

„Ég er ekki í þessu til þess að verða ríkur heldur til þess að geta vaknað á morgnanna með bros á vör,“ segir Nino og bætir við að hann hlakki til að mæta í vinnuna á hverjum degi. „Mig er búið að dreyma um að opna minn eiginn veitingastað alveg síðan ég fluttist hingað til lands og nú er draumurinn orðinn að veruleika,“ segir Nino sem hlakkar mikið til að fylgjast með mannlífinu á Laugavegi í sumar.