Ríkisstjórnin sögð svíkja loforð í skuldamálum

Þingmenn stjórnarandstöðunnar sökuðu ríkisstjórnina um að svíkja gefin kosningaloforð varðandi skuldavanda heimilanna á þingi í dag.

Sigmundur Davíð Gunnlaugsson forsætisráðherra mælti á Alþingi í dag fyrir þingsályktunartillögu um aðgerðir vegna skuldavanda heimilanna. Tillagan er í tíu liðum og felur meðal annars í sér að settur verður á fót sérfræðingahópur sem á að útfæra mismunandi leiðir til að ná fram höfuðstólslækkun verðtryggðra lána.

Guðmundur Steingrímsson, formaður Bjartrar framtíðar, spurði hvers vegna tillagan fæli ekki í sér beinar aðgerðir strax í sumar.

„Og háttvirtur þingmaður hlýtur líka að skilja að ný ríkisstjórn vilji læra af mistökum fyrri ríkisstjórnar og setja ekki lög sem ekki standast skoðun,“ var svar forsætisráðherra. „Vilji vanda til verks, setja eingöngu lög sem munu standast fyrir dómstólum og standast hvað varðar sanngirni.

Árni Páll Árnason, formaður Samfylkingarinnar, gagnrýndi tillöguna og sagði að hún væri óljós og ekki í samræmi við kosningaloforð framsóknarmanna.

„Hér er bara verið að tala með almennu blaðri og lofti um ekki neitt. Það er ekkert í þessu efnislegt sem hönd á festir og það er auðvitað ekki sæmandi ríkisstjórn sem situr í krafti þess að hafa lofað mönnum handföstum aðgerðum í skuldalækkun núna í sumar.“

Forsætisráðherra sakaði Árna Pál um rangfærslur og útúrsnúninga. „Það gengur ekki að háttvirtur þingmaður Árni Páll Árnason haldi áfram, enn, eftir að búið er að leiðrétta hann nokkrum sinnum, að fullyrða að framsóknarmenn hafi boðað að það yrðu greiddar út, sendar út einhverjar ávísanir eða fólk fengi peninga borgaða strax í sumar vegna skuldaleiðréttingaraðgerða. Það hefur legið fyrir frá upphafi að þetta héldist í hendur við annað og tengdist öðrum málum.“