Varað við fúskurum í barnavernd

Barnaverndaryfirvöld kanna nú starfsemi samtakanna Vörn fyrir börn. Áhyggjur yfirvalda beinast fyrst og fremst að þjónustumiðstöð sem samtökin opnuðu nýverið í Skútuvogi fyrir barnunga þolendur kynferðisofbeldis.

Páll Ólafsson, sviðsstjóri ráðgjafar- og fræðslusviðs Barnaverndarstofu, staðfestir þetta og segir starfsemina varasama. Hann bendir einnig á að ekki sé fullsannað að starfsfólk þjónustumiðstöðvarinnar sé faglært og slíkt sé mjög alvarlegt mál.

„Það er vissulega áhyggjuefni þegar svona einkaframtak fer af stað og setur sig jafnvel á móti yfirvöldum og okkar fagaðilum sem þó vinna brautryðjendastarf. Okkur ber því að sjálfsögðu skylda til að kanna slíka starfsemi,“ segir Páll.

Kristín Snæfells er forstöðukona Varnar fyrir börn. Hún segir mikla aðsókn í þjónustumiðstöðina, samtökin hafi ótal mál til vinnslu og þau séu hvert öðru erfiðara. Hún segist gefa lítið fyrir „kjaftasögur“ sem séu á kreiki um samtökin.

Spurð hvort ekki sé æskilegast að málaflokkurinn sé inni á borði barnaverndaryfirvalda segir hún svo vera en þó séu margir sem ekki treysti þeim tilteknu yfirvöldum. Hún segir að þó sé unnið að samstarfi á milli Barnaverndarstofu og samtakanna. Páll hafnar því alfarið að slíkt samstarf sé í vinnslu.

Í upplýsingum um starfsemi þjónustumiðstöðvarinnar á vefnum kemur fram að þar starfi sálfræðingar og lögfræðingar ásamt öðru starfsfólki. „Við erum með einn sálfræðing sem vann samfara námi sínu hjá Barnaverndarstofu og er því vel kunnugur starfsháttum hennar. Einnig erum við með lögfræðing sem vann hjá Fangelsismálastofnun,“ segir Kristín.

Samkvæmt upplýsingum Fréttablaðsins eru þetta tvær ungar konur. Sálfræðingurinn hefur þó ekki verið brautskráður úr námi og hefur því ekki fengið starfsréttindi sín útgefin. Starf hennar hjá Barnaverndarstofu var á vegum átaksverkefnis Vinnumálastofnunar fyrir háskólanema. Lögfræðingurinn er með BA-próf.

„Við efumst ekki um að þau vilji öll vel. En þau verða líka að segja frá starfseminni eins og hún er. Þau eru mikið að biðja fólk um peninga fyrir rekstrinum og slíkt má ekki gera á röngum forsendum,“ segir Páll.