Allir hressir í rigningunni í Reykjavík

Skólakrakkar og ferðamenn voru áberandi í borgarlandslaginu í slagviðrinu í gær. Ferðafólkið sagði regnið ekkert koma á óvart og börnin héldu sínu striki kampakát.

„Við erum nú alveg vön þessu því við erum frá Wales og þar rignir ansi mikið,“ sögðu þau Hywel Mallet og Samantha Harpet sem spókuðu sig létt í bragði í miðbæ Reykjavíkur.

Erlendu ferðamennirnir í höfuðborginni í gær virtust flestir vera af skemmtiferðaskipunum tveimur sem lágu við festar í Sundahöfn. Þeir virtust lítið láta rok og rigningu slá sig út af laginu, sögðust hafa átt von á slíkum trakteringum, bjuggu sig einfaldlega eftir veðri og fóru á stúfana.

Annar áberandi hópur var börn á lokasprettinum í skólanum fyrir frí. Hressir krakkar úr þriðja og fjórða bekk Breiðagerðisskóla gengu um Elliðaárdal og könnuðu leyndardóma hans. Í Viðey skoðuðu krakkar í sjötta bekk í Laugarnesskóla sig um og létu feiknavel af sér við komuna í land.