Bara aurar miðað við tjónið

„Þetta eru bara aurar miðað það sem hefði orðið ef við hefðum fengið verkið,“ segir Tyrfingur Guðmundsson, einn eigenda Hópbílaleigunnar, sem fékk í gær dæmdar um 249 milljónir króna í bætur frá íslenska ríkinu.

Héraðsdómur Reykjavíkur komst að því að fyrirtækið hefði orðið fyrir skaða þegar Vegagerðin hafnaði tilboði þess í skólaakstur á Suðurlandi og Suðurnesjum.

Hæstiréttur hafði áður viðurkennt skaðabótaskyldu ríkisins vegna málsins, sem á rætur að rekja til þess þegar Vegagerðin stóð fyrir útboði árið 2005 í skólaakstur fyrir Fjölbrautarskóla Suðurlands og Fjölbrautaskóla Suðurnesja.

Hópbílaleigan gerði hagstæðasta tilboðið í aksturinn en Vegagerðin hafnaði tilboðinu á þeim forsendum að Hópbílaleigan hefði ekki fjárhagslega og tæknilega burði til að standa við tilboðið. Niðurstaða dómstóla er sú að ekki hafi verið heimilt að hafna tilboðinu á þessari forsendu og að ákvörðunin hafi því brotið gegn ákvæðum laga um útboð.

Tjónið byggir á mati dómkvaddra matsmanna, en Tyrfingur segir það þó mjög vanmetið. „Félagið væri gríðarlega stórt og öflugt í dag ef það hefði fengið verkið,“ segir hann.