Semja um þröskuld við þjóðaratkvæði

Alls þurfa 40 prósent kjósenda að samþykkja umdeildar breytingar á stjórnarskrá, samkvæmt hugmyndum formanna stjórnmálaflokkanna að samkomulagi í stjórnarskrármálinu. Nokkuð þokaðist í samkomulag á milli flokkanna í gær, en enn ber á milli í nokkrum málum.

Birgitta Jónsdóttir, þingmaður Hreyfingarinnar, sat fund formannanna í gær. Hún sagði frá samkomulagsgrunninum á Facebook en formennirnir hafa hingað til verið tregir til að gefa upp um hvað það snýst. Katrín Jakobsdóttir, formaður Vinstri grænna, staðfesti við Fréttablaðið í gærkvöldi að breytingarnar hefðu verið ræddar.

„Við höfum verið að ræða áframhaldandi breytingar á breytingarákvæði stjórnarskrár. Það hefur verið rætt um að setja 40 prósenta samþykkisþröskuld, sem þýðir 80 prósenta þátttöku í mjög umdeildum stjórnarskrárbreytingum,“ segir hún.

Fleiri mál standa þó út af borðinu en stjórnarskráin. Fréttablaðið hefur heimildir fyrir því, meðal annars úr Framsóknarflokknum, að flokkurinn hafi lítinn áhuga að sjá lög um nýjan Landspítala verða að veruleika. Þá hefur verið rætt um gildistöku nýrra náttúruverndarlaga, en ekki náðst saman enn.

Viðræður fóru fram í nokkrum hópum í gær og gengu sumpart vel. Illugi Gunnarsson, formaður þingflokks Sjálfstæðisflokksins, segir viðræðurnar um margt hafa gengið vel.

„Við höfum verið að færast nær samkomulagi. Það hefur gengið ágætlega í dag [gær] og menn hafa fundið lausnir á ágætum meirihluta málanna. Það eru þó enn þá nokkur mál sem standa út af, en þau eru ekki mörg.“

Nokkuð hefur verið rætt um hvort stjórnarflokkarnir hyggist beita 71. grein laga um þingsköp og knýja fram atkvæðagreiðslu um stjórnarskrána. Samkvæmt heimildum Fréttablaðsins er hins vegar ekki meirihluti fyrir samþykkt hennar.