Flokkar ná ekki saman um þak á auglýsingar

Stjórnmálaflokkarnir hafa ekki komið sér saman um að setja hámark á kostnað við auglýsingar og kynningu í aðdraganda kosninganna. Einn fundur hefur verið haldinn um málið, en ekki hefur verið boðað til annars fundar. Kosið verður eftir um sex vikur, eða 27. apríl.

Björt framtíð lagði til á fundinum að þakið yrði lækkað úr fjórtán í þrjár milljónir. Aðrir flokkar tóku ekki vel í það. „Ég lagði til að þakið yrði lækkað í þrjár milljónir til að jafna leikinn og hvetja til markvissari kosningabaráttu," segir Atli Fannar Bjarkason, framkvæmdastjóri flokksins.

Samfylkingin boðaði fulltrúa flokkanna á fund um málið fyrir rúmri viku. Sigrún Jónsdóttir framkvæmdastjóri segir flokkinn jákvæðan gagnvart slíku þaki en veit ekki hvort það kemst á. Aldrei sé þó of seint að ná saman.

Jónmundur Guðmarsson, framkvæmdastjóri Sjálfstæðisflokksins, segir flokk sinn opinn fyrir samkomulagi af þessu tagi. Það verði hins vegar að gerast fljótlega ef það eigi að ná tilgangi sínum, enda skammt til kosninga.

Auður Lilja Erlingsdóttir, framkvæmdastjóri Vinstri grænna, er ekki bjartsýn á samkomulag. „Mér heyrðist að það væri ekki grundvöllur fyrir samkomulagi," segir hún og vísar í tillöguna um lækkun í þrjár milljónir. „Ég væri mjög jákvæð gagnvart því að hafa þetta eins og í síðustu kosningum."

Hrólfur Ölvisson, framkvæmdastjóri Framsóknarflokksins, segir eðlilegt að gera slíkt samkomulag. Það þurfi þó að gerast sem fyrst. „Það er einn aðili sem séð hefur um að kalla okkur saman," segir hann og vísar til Samfylkingarinnar. „Það hvílir þó ekki meiri ábyrgð á honum en okkur hinum."