Hestamenn ríða þvert yfir Ísland

Fjórir hestamenn, sem ætla ríðandi milli Bjargtanga og Dalatanga, og brúa þannig vestustu og austustu byggðir Íslands, Vesturbyggð og Fjarðabyggð, lögðu í gær upp í seinni áfanga leiðangursins, frá Skagafirði til Austfjarða. Fyrri áfangann, frá Vestfjörðum til Skagafjarðar, riðu þeir í fyrrasumar á tólf dögum og áætla þeir jafnmarga daga í síðari legginn.

Fjórmenningarnir í þessum fyrsta reiðtúr sem vitað er um þessa leið þvert yfir Ísland eru bræðurnir Magnús Pétursson ríkissáttasemjari og Pétur Óli Pétursson, Ólafur Finnbogason og Sigurður Sævar Sigurðsson. Þeir verða með 15-16 hesta til reiðar.

Þeir lögðu upp frá Vindheimum á hádegi í gær og var fyrsta dagleiðin að Hálfdánartungum, við rætur Hörgárdalsheiðar. Í dag áforma þeir að ríða að bænum Skriðu í Hörgárdal og á morgun að Svertingsstöðum í Eyjafirði. Þaðan áforma þeir að fara á mánudag um Bíldsárskarð yfir í Fnjóskadal og að Stóruvöllum í Bárðardal.

Dagana þar á eftir liggur leiðin um Stöng og Álftagerði í Mývatnssveit, yfir Jökulsá hjá Grímsstöðum á Fjöllum og síðan verður gamla þjóðleiðin riðin austur Möðrudalsöræfi. Næstkomandi fimmtudag áforma þeir að koma í hlað á Möðrudal. Þaðan halda fjórmenningarnir að Sænautaseli og síðan niður á Jökuldal hjá Hákonarstöðum og Klausturseli, yfir Fljótsdalsheiði og á laugardag eftir viku hyggjast þeir koma niður í Fljótsdal hjá Bessastöðum við Skriðuklaustur.

Síðustu þrjá dagana gerir áætlunin ráð fyrir að riðið verði úr Fljótsdal að Útnyrðingsstöðum við Egilsstaði, þaðan um Fagradal og yfir Mjóafjarðarheiði að Brekku í Mjóafirði. Síðasti áfanginn er svo út að Dalatanga en þangað vonast fjórmenningarnir til að ná þriðjudaginn 16. júlí.