Öllum ferðum Herjólfs aflýst en samt góð stemning á Goslokahátíð

Öllum fjórum ferðum Herjólfs til Vestmannaeyja í dag hefur verið aflýst vegna veðurs. Ölduhæð í Landeyjahöfn var þrír metrar klukkan fjögur í dag. Þrátt fyrir erfiðleika í samgöngum milli lands og Eyja segir formaður Goslokahátíðarinnar að mikið stuð sé í Vestmannaeyjum.

Goslokahátíðin fer fram um helgina en í janúar næstkomandi verða 40 ár liðin frá því að gos hófst í Heimaey.

Hildur Sólveig Sigurðardóttir, formaður Goslokahátíðarnefndar, segir að einhverjir gestir hafi ætlað að koma með ferjunni til Eyja í dag.

„Við látum það ekkert hafa alltof mikil áhrif á okkur. En auðvitað þarf maður að hringja aðeins fleiri símtöl og þetta er náttúrulega leiðinlegt fyrir fólkið sem ætlaði að koma. En við gerum bara gott úr þessu eins og öðru."

Hátíðin hófst á miðvikudaginn þegar ný heimildarmynd um gosið var frumsýnd. Stanslaus dagskrá hefur verið síðan þá, meðal annars tónleikar með Fjallabræðrum. Í dag hefur verið dorgveiðimót og vestmannaeyjahlaup fyrir krakkana.

„Núna er einmitt að fara af stað barnadagskrá í íþróttamiðstöðinni. Hún var færð af Stakkagerðistúni vegna veðurs en þá akkurat þegar búið var að taka ákvörðun um það fór sólin að glenna sig. Svo verður vítaspyrnukeppni eftir þetta þar sem stórstjarnan David James leyfir krökkunum að njóta sín. Síðan verður þessi gamla góða eyjastemning í kvöld niðri á Skipasandi þar sem hinar ýmsu hljómsveitir syngja fyrir Vestmannaeyinga og allir bara skemmta sér."

Aðspurð hversu margir gestir eru á hátíðinni segir Hildur: „Það er góð spurning. Þeir hjá Eimskipum voru búnir að reikna með því að fjöldinn í Eyjunni myndi tvöfaldast þannig að ætli það séu ekki svona 8000 manns í bænum."

„Þetta er bara eins og á lélegri þjóðhátíð?"

„Já ætli við getum ekki sagt það," segir Hildur og hlær. „En við erum auðvitað rosalega ánægð með þetta og allt farið mjög vel fram hingað til."